Laiha Guarda Eskola, Difikulta Ba Eskola

DILI, STLNEWS.co – Oras nee daudaun Ensinu Baziku Filial (EBF) Naroman seidauk iha guarda eskola, tanba guarda neebe iha daudaun nee moras strok.

Lia hirak nee hatoo husi Koordenadora EBF Naroman, Rosinha Monteiro katak, sira hasoru difikuldade ida mak konaba guarda eskola, tanba antes nee sira iha tiha ona guarda eskola, maibe daudaun nee nia moras strok hela, entaun ho moras ida nee nia labele mai ona eskola.

“Ami agora iha difikuldade oituan, tanba ami nian guarda eskola agora moras strok. Durante fulan tolu nian laran komesa nia moras iha fulan Novembru too agora, nee duni too agora ami laiha guarda eskola,” esplika Rosinha ba STL Domingu nee (28/01/2024).

Rosinha dehan, eskola nee tenki iha duni guarda eskola para bele halo kontrolu ba areador eskola, maibe daudaun nee laiha guarda eskola, sai difikulta, tanba guarda eskola moras nee labele mai ona eskola.

“Ita espera katak, ami bele iha fali guarda eskola hodi kontrolu ami nian estudante sira iha sala laran, tanba nia moras ona strok, entaun nia labele ativu ona mai iha eskola, hau hanoin ami presiza guarda eskola,” dehan nia.

Iha sorin seluk, Maria do Rego hanesan inan husi estudante hatete, eskola nee tenki iha guarda eskola para bele kontrola estudante sira, se lae estudante sira tama sai iha portaun eskola, se mak atu kontrola sira.

“Hau hanoin tuir lo-loos eskola nee iha guarda eskola hodi halo kontrola ba ami nian oan sira neebe kada loron mai eskola, se lae labarik sira tama sai iha portaun nee lao ba too iha estrada boot,” nia dehan.

Iha fatin seluk, Koordenador pre eskolar Sagrada Familia, Cornelio Antonio Soares kestiona konaba guarda eskola, maski durante nee sempre halo hela deit karta ba Ministeriu Edukasaun, maibe too agora rezultadu laiha.

(mar)

LEAVE A REPLY

Please enter your comment!
Please enter your name here