DILI, STLNEWS.co – Eskola Bazika Sentral (EBC – sigla portugues) Manleuana seidauk iha osan konsesoins, no eskola sei deve deit iha rental balun hodi halo kopia ba materia ezame primeiru periodu ninia.
Kestaun nee hatoo husi Gabineti Apoiu Tekniku (GAT) husi EBC Manleuana, Luisa Amelia Florindo Reis ba STL iha nia knaar fatin Manleuana, Segunda nee (03/04/2023).
“Konaba pontus ezame ba primeiru periodu, agora daudaun ami prepara hela, tanba pontus ezame sira nee ami elabora hotu ona, ami halo hotu ona kopia, hein atu realiza deit ona ezame ba primeiru periodu. Total estudantes neebe atu partisipa iha ezame nee hamutuk 1908, numeru estudantes ida nee mak sei partisia iha ezame,” tenik nia.
Nia dehan, primeiru ano too quatro ano, nee avaliasaun kontinua too sesto ano, maibe foin daudaun halo enkontu no desizaun entre profesores sira katak, quinto ano ho sesto ano nee folha prova ninia.
“Ami desidi tiha ida nee, depois mai fali dehan, komu desizaun husi profesores sira ami foti uluk ona, entaun primeiru periodu ami lao tuir ida nee, ami nian pontus ba ezame nee preparadu ona, ami tau iha kada amplop idak-idak, maibe agora daudaun osan konsesoins seidauk iha, ami deve deit iha rental balun, depois konsesoins tun mai foin kompleta fali, ami nian profesores hamutuk 51,” nia esplika.
Nia dehan, bazeia ba kalendariu ezame nee sei halao iha loron 10 fulan nee, maibe foin daudaun sirkular nee tun fali mai, tanba paskua, nunee ezame nee muda fali ba loron 17 fulan ida nee, husi eskola sei kria enkontru ida para ezame nee realiza tuir kalendariu ninia.
(jac)
