DILI, STLNEWS.co – Ministeriu Ensinu Superior Siensia no Kultura (MESSK) halo lansamentu ofisial ba akreditasaun institusional no programatika 2023.
Tuir Diretora Jeral Ensinu Superior, Maria Filomena Lay Guterres neebe lee diskursu Ministru Ensinu Superior Siensia no Kultura (MESSK) Longuinhos dos Santos katak, avaliasaun institusional no programatika iha ensinu superior importante tebes ba kualidade ensinu superior. Prosesu avaliasaun kontribui atu hadia kualidade ensinu. Identifika nesesidade iha kada instituisaun transparensia iha prosesu edukasaun no prestasaun kontas nian.
“Tanba nee, hau apela ba prezidente konselhu direitu no Direitor Ezekutivu ANAAA nian atu hametin kooperasaun ida ho nasaun CPLP sira, liu-liu ajensia ba avaliasaun no akreditasaun ensinu superior Portugal nian, no renova fali protokolu sira ho siensia sira avaliasaun no akreditasaun nian husi Indonezia,Malazia no Filipina,” dehan Maria ba jornalista bainhira lee diskursu Ministru iha salaun Delta Nova, Sesta nee (17/03/2023).
Nia dehan, liu husi avaliasaun no akreditasaun ba instituisaun ensinu no kursu sira, ANAAA nian papel fundamental mak kontinua promove nafatin kualidade ensinu neebe diak liu tan no kontribui ba dezenvolvimentu pais nian.
(jac/mad)
