DILI, STLNEWS.co – Diresaun Edukasaun Pre Eskolar husi Ministeriu Edukasaun aprejenta ona planu atu loke Eskola Iha Uma ba munisipiu tolu, maibe sei hein orientasaun husi ministra.
“Eskola Iha Uma nee tinan kotuk nian, ita konklui kompletamente ona, ita nian membru governu foun mai nee, ita halo tiha ona aprejentasaun relatoriu ba implementasaun iha tinan 2022 ninia, ita mos aprejenta ona planu ba tinan 2023, ita hein orientasaun husi ministra, oinsa mak ita implementa fali iha 2023, ba iha munisipiu tolu, Baukau, Ermera ho Bobonaro inklui Dili,” dehan Diretor Nasional Pre Eskolar iha ME, Tomas Perreira ba STL iha JL-Vila Fatuhada, Dili, Segunda nee (24/07/2023).
Nia dehan, programa nee implementa iha tinan kotuk, no planu tan ba tinan ida nee, maibe atu kontinua ou lae, nee sei hein orientasaun husi ministra, ninia progresu mak sira halo ona preparasaun atu halo enkontru ho Prezidente Autoridade Munisipiu haat nee, ninia administrador postu inklui xefi suku, xefi aldeia sira.
“Hein deit orientasaun husi ministra, dehan ita lao halo enkontru para foti dadus, no ita implementa enkontru ho xefi suku no xefi aldeia sira konaba eskola tuir ita nian tarjetu, nee kada munisipiu sei 50, loke tan ba munisipiu seluk nee depende ba ministra,” nia afirma.
Nia dehan, maibe nee depende husi orientasaun Ministra Edukasaun, kontinua ho maneira oinsa nee konforme orientasaun husi ministra, tanba agora halo tiha ona, hein orientasaun deit.
Iha fatin seluk, Direitor EBC Fatumeta, Feliciano da Costa Gusmao dehan, iha sira nian eskola, professores asina kontratu ba programa eskola iha uma laiha, tanba sira kontratu atu hanorin duni eskola iha nee.
“Ami nian profesores iha eskola nee asina kontratu ba programa Eskola Iha Uma laiha, maibe asina kontratu hanorin iha ami nian eskola, neebe ami nian asina kontratu ba Eskola Iha Uma laiha,” tenik nia.
Nunee mos Diretor Eskola Sekundariu Jeral no 4 de Setembru Balide, Martinho de Menezes hatete, ba asuntu nee labele responde, tanba sei okupadu hela ho servisu seluk.
(jac)
