DILI, STLNEWS.co – Bainhira universidade balun loke klase paralelu iha munisipiu tenke kumpri regras, karik la kumpri diak liu taka.
Informasaun nee hatoo husi Ministru Edukasaun Superior Siensia no Kultura, Jose Honorio da Costa Pereira Geronimo ba jornalista sira iha edifisiu Centro Nacional Chega, Balide, Tersa nee (11/07/2023).
“Ita tenki haree eskola ensinu superior sira neebe gradua sira nian estudantes tuir duni padraun neebe Ministeriu Ensinu Superior hasai, balun iha klase paralelu, balun ministeriu tenki foti desizaun, karik la tuir regras ensinu superior nian ita tenki hapara, tanba ita loke universidade iha Timor barak, maibe kursu neebe hanesan, agora ita nian graduadus sira nee bele kompete ho ita nian nasaun vizinhu sira ka lae,” nia dehan.
Nia afirma, tenki rekonhese katak sei iha problema ensinu superior, maibe liu husi ministra foun koko atu rezolve situasaun sira nee hotu, tanba hotu-hotu tenki tuir regras neebe husi ministeriu hasai, no ministeriu hanoin ona atu halo lei baze de ensinu superior para atu bele regulariza institutu publiku no privadu sira iha TL.
Iha fatin seluk, Reitor ISC Sebastiao Perreira hatete, ISC nian klase polo iha Baukau no Manufahi daudaun nee ativu hela, no polo iha Aileu lisensa operasional, maibe rua neebe mak temi ona nee ninia aprendizajen lao hela.
“Ami nian polo iha Baukau no Manufahi ninia aprendizajen lao hela, no ami kria kondisaun no fasilidade ba ita nian estudante sira,” nia dehan.
Entretantu, Diretor Ezekutivu ANAAA, Nilton Paiva hatete, klase paralelu neebe daudaun nee ativu mak ISC nian polo iha Munisipiu Baukau no Manufahi, IOB nian iha Maliana, DIT nian iha RAEOA Oekusi, agora hirak neebe mak atu loke nee husu ba Ministeriu Ensinu Superior, tanba pedidu nee universidade sira hatama ba Ministeriu Ensinu Superior.
(jac)
