DILI, STLNEWS.co – Ministeriu Edukasaun (ME) semana ida nee nia laran halo ona pagamentu ba profesores kontratu tinan 2023, hamutuk 1.416 ba sira nia konta bankaria.
Informasaun nee hatoo husi Ministra Edukasaun (ME), Dulce de Jesus Soares ba jornalista sira iha JLVila Fatuhada, Kinta nee (28/09/2023).
Iha semana ida nee nian laran, iha 1.416 pesoas mak sira nian osan tama ona iha sira nian konta bankaria, no profesores balun neebe mak seidauk simu osan nee, tanba seidauk hatama lista prezensa, balun estatutu iha, no balun sira nian estatutu katak, sira seidauk sidadaun TL neebe lo-loos,” dehan ME Dulce.
Nia dehan, balun mak sira nian estatutu katak seidauk sidadaunTL lo-loos, sira balun sira nia kaben husi rai seluk, sira mos hetan kontratu husi ME, maibe tuir lei tenki haree sasan sira nee ho didiak, no balun muda tiha ona, no asina kontratu fali iha fatin seluk.
“Hau hanoin nia tenki asina kontratu husi eskola neebe hanorin ba, se nia asina kontratu ho ME, nia servisu iha fatin seluk ou kontratu iha fatin seluk, nee la merese atu hetan pagamentu, problema oin barak tebes, maibe too ikus presentajen kiik los,” nia afirma.
Iha fatin seluk, Direitor EBC Fatumeta, Feliciano Gusmao dehan, iha EBC Fatumeta profesores kontratu nain rua deit, maibe daudaun nee sira nian salariu tama ona sira nian konta bankaria idak-idak nian.
“Hau hanoin iha ami nian eskola ita nian profesor kontratu nain rua deit, maibe sira nian salariu tama fulan 8 ninia, nee duni sira simu ona sira nian direitu neebe mak durante nee sira hein,” nia afirma.
Entretantu, Agostinho Pinto hanesan Profesor Kontratu dehan, sira nia kontratu too 31 Dezembru, maibe ME hasai despaisu ba funsaun publika ensera sira nian kontratu iha 30 Agostu fulan kotuk.
Dokumentus nee sira asesu iha funsaun publika, sira husu para ministra no Sekretariu Estadu atu fo klarifikasaun ba sira, tanba saida ensera sira nia kontratu iha fulan Agostu fulan kotuk, tanba tuir prazu sira nia kontratu sei termina iha fulan Dezembru.
“Ami hetan ona pagamentu, maibe pagamentu husi Janeiru too Agostu deit la inklui fulan Setembru. Ami husu para Ministeriu Edukasaun tenki klarifika ba ami konaba salariu fulan Setembru mai oin halo nusa,” nia komenta.
(jac)
