DILI, STLNEWS.co – Ministeriu Edukasaun (ME) hanesan empregador ida, iha obrigasaun atu selu profesores kontratu sira.
“Tanba nee ME asina ona dokumentus, maibe talves atraza, tanba rekolha dokumentus sira. Hau hanesan Ministra Edukasaun, hau asina tiha ona dokumentus ba prosesu pagamentus, maibe hanesan profesor kontratadu iha garante katak ema nee hanorin duni iha eskola neeba, sei nia laiha lista prezensa iha neeba,” dehan ME Dulce de Jesus Soares ba jornalista iha Delta Nova, Kinta nee (14/9/2023).
ME Dulce, mezmu sira asina kontratu ho ME, sim nia hateten baibain katak hanesan empregador ida iha obrigasaun atu selu ema neebe asina kontratu ho sira. Maibe tenki iha evidensia mak foin ME halo pagamentu, talves ke atrazu sira nee hotu, tanba prosesu atu rekolha dokumentus sira nee.
“Hau repete dala barak ona ho media katak, ami sei halo ingresu espesial ida ba sira neebe iha kontratu ho Ministeriu Edukasaun minimu iha sira nia kontratu ikus iha fulan Dezembru 2022, no ba sira neebe asina kontratu depois fulan Dezembru 2023 sei la konsidera hanesan kontratadu, maibe ME iha obrigasaun atu selu sira,” dehan nia.
Nia espilika, konaba estatutu profesores kontradu ba permanente nee, ME halo ingresu espesial ida, dekretu lei neebe entre envigor iha numeru 1 Julhu 2023.
Iha parte seluk, Diretor SEM Manatuto, Graciano de Jesus Baptista dehan, husi Manatutu nian foin prosesu, dala ruma fulan ida nee mak tama, tanba agora sei iha prosesu.
“Hau hanoin husi Manatutu ninia sei iha prosesu, la hatene fulan ida nee mak sei tama karuk,” tenik nia.
Entretantu, Diretor SEM Dili, Carlito da Silva dehan, too agora salariu profesor kontratu seidauk tama, maibe ida nee kompetensia husi nasional ninia, oinsa mak bele haree asuntu ida nee, tanba sira antes nee asina ona kontratu.
(jac)
