DILI, STLNEWS.co – Enkontru entre Ministeriu Edukasaun (ME) ho Governu Nova Zelandia, koalia konaba kooperasaun servisu neebe durante nee apoiu ME liu husi Programa Hands, neebe implementa dezde iha 2015 too agora.
“Ohin enkontru ho maluk sira neebe mak servisu iha programa kooperasaun servisu entre ME ho Governu Nova Zelandia, neebe mak durante nee apoiu ona ME dezde iha tinan 2015, programa nee naran Hansd, halimar, aprende no deskobre susesu, programa nee sira nian apoiu, hau dehan tiha ona, apoiu ba pre eskolar, iha area barak, formasaun ba profesores, formasaun ba inspetor pre eskolar, dezenvolve materia didatikus, buat barak neebe iha area pre eskolar ninia, inklui fatin halimar ba labarik sira,” dehan Ministra Edukasaun, Dulce de Jesus Soares ba jornalista sira iha sala VIP ME, Segunda nee (14/08/2023).
Nia dehan, oinsa mak dezenvolve liu tan programa nee ba oin, programa pre eskolar sai hanesan programa importante tebes-tebes, tanba koalia konaba edukasaun fundasaun nee importante, iha programa pre eskolar nee, hahu husi labarik neebe tinan 3 too tinan 5, atu garante katak, pelumenus konhese no hatene ona letra numerasia.
“Bainhira tama ba primeiru ano, iha preparasaun neebe diak tebes-tebes, ita iha problema ida, tanba ita nian taxa kobertura pre eskolar nee sei menus, foin mak 30%, entaun liu husi Programa Hands nee, ita hakarak apoiu no habelar liu tan ba munisipiu sira iha postu administrativu, nunee suku sira neebe seidauk iha programa pre eskolar bele asesu,” nia afirma.
Nia akresenta, iha governu anterior, bainhira aloka tiha orsamentu ba programa pre eskolar, governu husu apoiu ba iha Hands atu ajuda ME, atu implementa programa nee, husi programa ida naran eskola iha uma. Ohin loron iha enkontru ida nee sei haree hotu programa neebe mak Hands halao kooperasaun ho ME, no programa neebe mak governu tau osan ba Governu Nova Zelandia, hodi halao programa eskola iha uma.
“programa eskola iha uma nee ita implementa iha Dili, maibe Programa Hands nee kobre tiha ona Munisipiu 12 inklui RAEOA, nee lao dezde iha tinan 2015 too ohin loron,” tenik nia.
Iha fatin hanesan, Pedro Ximenes nudar ekipa lider ba Programa Hands dehan, objetivu prinsipal rua neebe ohin mai hasoru ME atu kongratula ministra ba ninia knaar foun, no liu husi programa nee suporta nafatin ME nian servisu, tanba uluk ministra rasik hamosu programa ida nee, neebe laos ema foun, no lalaok saida mak durante nee atinji ona, iha pre eskolar atendimentu prinsipal tuir ministra rasik uluk koalia ona ho Governu Nova Zelandia, koalia ona atu aumenta taxa partisipasaun iha pre eskolar.
“Ami husi Programa Hands hetan finansamentu husi Governu Nova Zelandia, maibe ita setvisu hamutuk ho ME hahu kedas iha 2015 too agora, no orsamentu rasik mai husi Governu Nova Zelandia,” nia komenta.
(jac)
