DILI, STLNEWS.co – Ministeriu Edukasaun (ME) liu husi Diresaun Asaun Sosial Eskolar (DNASE) koordena servisu ho ministeriu tolu, Ministeriu Administrasaun Estatal, Ministeriu Saude no Ministeriu Agrikultura no Peskas, ba implementasaun merenda eskolar.
“Implementasaun programa merenda eskolar lao hanesan baibain, dias efetivus husi diresaun aloka ba 180 dias, maibe orsamentu neebe preve husi Ministeriu Administrasaun Estatal iha 180 dias, neste momentu halao hanesan baibain hela, ministeriu nian papel mak ita sei halo monitorizasaun, aleinde husi ministeriu rasik. Ita mos koopera ho parseiru relevantes sira neebe implementa programa merenda eskolar,” dehan Diretor Nasional DNASE, Joaquim Martins ba STL Tersa nee (18/07/2023).
Nia dehan, sei halo monitorizasaun ba iha minisipiu sira nee involve mos husi diresaun sira, hodi haree implementasaun programa merenda eskolar, nee lao tenki diak no susesu, bazea ba manual neebe mak prepara ona, menu neebe oferese ba implementasaun merenda eskolar bazea ba grupu tolu, haburas no protesaun ba estudante sira.
“Ita uza liu produtu lokal neebe mak eziste iha kada munisipiu, tanba nee ita nian manual nee rasik orienta ona para ita tenki utiliza implementasaun programa merenda eskolar, uza aihan lokal, tanba nee iha implementasaun ba programa nee rasik laos ME mesak, ita koordena ho Ministeriu Administrasaun Estatal, Ministeriu Saude no Ministeriu Agrikultura no Peskas, atu nunee hasae produsaun atu bele fornese ba eskola ba implementasaun programa merenda eskolar,” tenik nia.
Iha fatin seluk, Direitor SEM Manatuto, Graciano de Jesus Baptista hatete, konaba programa merenda eskolar iha eskola sira lao hanesan baibain, tanba programa refere husi jestor programa sira mak jere programa ida nee iha eskola ida-idak.
“Hau hanoin ita nian programa merenda eskolar iha eskola sira Munisipiu Manatutu lao hanesan baibain, tanba uluk prpgrama refere husi eskola mak jere, agora ita nian jestor sira mak jere programa nee,” dehan nia.
Nunee mos koordenador pre eskolar sagrada familia, Cornelio Antonio Soares hatete, estudantes sira asesu ba merenda eskolar kada loron han tuir oras, tanba implementasaun merenda eskolar oinsa mak estudante sira husi eskola idak-idak bele asesu ba programa ida nee.
(jac)
