DILI, STLNEWS.co – Atu tama ASEAN ka la tama, Ministeriu Edukasaun (ME) iha responsabilidade atu hasae kualidade edukasaun.
Lia hirak nee hatoo husi Ministra Edukasaun (ME), Dulce de Jesus ba jornalista sira iha sala VIP ME Vila-Verde, Kuarta nee (02/08/2023).
“Ami husi ME, ami nian parte ami tenki halo nafatin, atu tama ASEAN ka la tama, ME iha responsabilidade tomak atu hasae kualidade edukasaun, tanba nee hau husu iha Visi Ministra asuntu konaba ASEAN nian, diak liu prepara aan,” katak ME Dulce.
Aleinde nee, ME Dulce fo komentariu konaba Orsamentu Ratifikativu, seidauk hatene hira mak sira hetan, depende ba komisaun orsamentu sira mak sei tur hamutuk fila-fali, hodi haree didiak pedidu neebe mak sira halo.
“Ami iha pedidu duni, maibe ami sei tur hamutuk, tanba ami nian ME taxa de ezekusaun sei tun tebes-tebes, tuir lo-loos taxa de ezekusaun too ona fulan hanesan ita tenki liu ona 50%, tanba ami mai foin deit 30%, ami tenki halo ezersisiu interna ida atu haree hotu, oinsa mak ami jere osan neebe mak iha, depois mak ami sei husu ratifikativu, kuandu ami presiza, maibe primeiru estar ami tenki halo uluk ezersisiu interna, husi alokasaun neebe ami hetan ona iha ME pur volta 122 milhoens,” nia dehan.
Iha Sorin seluk, Diretor Jeral Administrasaun Jestaun no Finansas husi ME, Antoninho Pires dehan, adere ba ASEAN, ME sempre iha preparasaun, oinsa atu investe iha setor edukasaun hodi nunee bele hasae kualidade edukasaun iha TL. Konaba orsamentu ratifikativu nia rasik labele fo komentariu.
(jac)
