DILI, STLNEWS.co – Ministeriu Edukasaun (ME) sei rezolve profesores neebe naran tama iha lista reklamantes ba II faze ninia.
“Ami aprezenta ona profesores lista reklamente 3 mil ba Ministra Edukasaun, hodi halo verifikasaun lo-loos konaba dadus oinsa atu halo kompleta dokumentus, atu nune’e iha tempu badak sei rezolve ba profesores sira nia direitu kada fulan,” esplika Diretor Jeral Administrasaun Jestaun no Finansas husi ME, Antoninho Pires ba jornalista sira iha nia knaar fatin, Kinta nee (03/08/2023).
Tuir Antoninho Pires, altura nee ba halo selesaun ba profesores lista reklamentes, nee hatoo ba ministra konaba dadus husi Komisaun Funsaun Publika, hodi fo prioridade halo pagamentu ba profesores sira nia direitu neebe hahu fulan Janeiru mai too iha fulan Julhu. Lista reklamente hamutuk 3 mil ital, maibe vaga nee 500 deit.
“Prosesu nee agora lao daudaun ona, tuir dekretu lei rejime de kareira hodi revolga husi dekretu lei numeru 23, rejime kareira ba profesores, tanba ho dekretu lei numeru 31/2023 revogasaun ida nee mak hatur ona, oinsa mak profesores kontratu sira antigu nee bele goza ba rejime kareira nee rasik, tama hodi halo ingresu hodi goza rejime kareira hanesan mos ita nian profesores permante sira,” nia haktuir.
Nunee mos Direitor SEM Manatuto, Graciano de Jesus Baptista dehan, konaba profesores reklamantes no kontratu ninia, husu deit ba iha parte nasional, tanba dadus sira husi edukasaun munisipal haruka ba nasional.
“Hau hanoin konaba asuntu ita nian profesores reklamantes no kontratu sira nee, diak liu husu deit ba parte nasional, tanba nee kompetensia husi nasional ninia,” katak nia.
Iha parte seluk, Direitor SEM Likisa Carlos Lopes hatete, naran reklamantes sira nee husi nasional mak halo verifikasaun, maibe profesores iha Likisa rasik balun asina ona kontratu iha primeiru faze no balun mak tama iha lista reklamantes.
“Ita nian profesores iha Likisa balun asina ona kontratu iha primeiru faze no balun nak tama iha lista reklamantes ninia,” nia afirma.
(jac)
