ME Verifika Ingresu Espesial Ba Faze 2

DILI, STLNEWS.co – Ministeriu Edukasaun (ME) liu husi Diresaun Rekursu Umanu, kontinua halo verifikasaun ba profesores ingresu espesial ba segundu faze nian.

“Ingresu espesial nee ami halao ona iha primeira faze, ita hetan 4080 profesores neebe rezivel ba iha ingresu espesial, nee despaisu hasai ona no manda ona ba iha jornal republika, agora ami halo hela verifikasaun ba iha segundu faze nian, nee husi prosesu sira nee agora ami halao hela, ida nee nafatin servisu hamutuk ho ekipa konjunta entre Komisaun Funsaun Publika (CFP) ho ME, bazeia ba halo akordu entre ME ho CFP neebe ami halao hela no seidauk finaliza,” dehan Anita Tavares Ribeiro de Jesus, nudar Diretora Rekursu Umanu iha ME ba STL nia knaar fatin, Segunda nee (11/12/2023).

Nia dehan, ba profesor sira neebe laiha naran, husi parte ministeriu husu para sira bele kompleta sira nian dokumentus, nunee sira bele lezibel, neebe lor-loron profesores sira tama mai nee barak hela, entaun sira mai kompleta sira nian dokumentus, liu-liu ba avaliasaun dezempenu, no sira neebe prienxe ona kriteriu.

“Tenki iha minimu baxarelatu, entaun sira tenki mai kompleta, depois ami prosesu, agora dadus nee ami hamutuk ho komisaun haree profesor sira neebe agora foin rona inklui mos Oekusi, ami halo prosesa loron nee, nee duni ba segundu faze nian ami seidauk iha dadus, tanba kada loron ita nian profesor sira mai kompleta nafatin sira nia dokumentus iha ministeriu,” nia afirma.

Nia sublina, nee duni kada loron husi diresaun ida nee kontinua atende ba profesor sira neebe mai kompleta sira nian dokumentus, nee duni seidauk finaliza, sira tau kalendariu atu finaliza nee tenki too 15 fulan Dezembru, tenki finaliza ona.

“Nee tuir dekretu lei no 31 nee, sira sei asina deklarasaun hodi hili, sira neebe la elijibel, nee sira sei asina deklarasaun ida hodi hili katak, sira sei kontratu indeterminadu ou ka indemizasaun nee ba sira neebe laiha lejibel ou sira neebe laiha diploma baxarelatu, nee ba sira neebe kontratu antigu nee, nee sira hili alternativa rua,” tenik nia.

(jac)

LEAVE A REPLY

Please enter your comment!
Please enter your name here