MEJD Apoiu Livru Ba PESF

DILI, STLNEWS.co – Ministeriu Edukasaun Juventude no Desportu (MEJD) apoiu livru kaixa 5 ba Pre Eskolar Sagrada Familia Vila Verde.

Haktuir Koordenador Pre Eskolar Sagrada Familia, Cornelio Antonio Soares ba STL iha Vila Verde, Tersa nee (16/05/2023).

“Ami simu livru husi Ministeriu Edukasaun hamutuk kaixa 5, ho total livru 652, kaixa 3 konaba livru istoria no kaixa 2 seluk konaba mata dalan alfabetu no simbolu sira, livru neebe ami simu nee ba ami nian estudante sira,” nia esplika.

Nunee mos Beatriz da Silva hanesan profesora husi Pre Eskolar Sagrada Familia Vila Verde hatete, livru sira nee ba estudante sira, tempu feriadu fo ba kada estudante lori ba uma para bele halo TPC ruma.

“Livru sira nee ba ita nian estudante sira, tanba feriadu ami fo ba ita nian estudante sira lori ba uma para bele halo TPC iha uma,” dehan nia.

Iha fatin seluk, Diretor Eskola Sekundaria Novel da Paz, Jeremias Pinto de Jesus hatete, too agora sira sei menus livru ba estudante sira.

“Difikuldade neebe Eskola novel da Paz hasoru mak livru hanorin ba estudante sira mak menus tebes, ho nunee hanesan diretor eskola buka meus oinsa para Ministeriu Edukasaun apoiu livru neebe barak,” dehan Jeremias.

Nia dehan, tanba iha nee laos livru ba materia ida deit, maibe ba materia sira hotu sei menus, tanba estudantes no profesores atu lee barak, maibe sira sei menus livru.

“Husu ba ministeriu aumenta livru para estudante sira bele lee barak, no profesor sira mos bele lee no hanorin fali ba estudante sira, ami iha nee presiza kualker livru, livru nee mak prinsipal liu ba estudante sira nomos ba profesor sira. Hanesan manorin nain sira tenki lee barak, nunee bele orienta ba estudante no ba profesor sira,” nia informa.

Jeremias dehan, hanesan profesor hanorin oan sira ho kualidade, nee duni husu ba ministeriu mak tenki hadia kurikulu iha edukasaun, iha eskola balun profesor laiha ba material portugues, mak hanesan Eskola Sekundaria 04 Setembru neebe foin daudaun nee menus profesor ba lingua portugues.

(jac)

LEAVE A REPLY

Please enter your comment!
Please enter your name here