DILI, STLNEWS.co – Asinatura protokolu entre Ministeriu Edukasaun Juventude no Desportu (MEJD) Timor Leste ho MEJD Portugal, konaba kooperasaun bilateral iha projetu Eskola Cafe.
Liu husi intervista ba jornalista, Ministru Edukasaun Juventude no Desportu (MEJD), Armindo Maia iha edidisiu MEJD, Tersa nee (14/03/2023) hatete, eventu ida ohin konaba asinatura protokolu entre MEJD TL ho MEJD Portugal, konaba koperasaun bilateral iha projetu Eskola Cafe, tanba Eskola Cafe nee dezde tempu naruk ona, maibe asina protokolu ohin.
“Asina protokolu ohin nee, aleinde ita renova kontratu, ita mos konsolida reforsa no loke dalan atu munisipiu hotu-hotu tenki iha Eskola Cafe inklui Munisipiu Espesial Atauro, protokolu ida ohin nee loke dalan atu Eskola Cafe bele espande ba postu administrativu,” haktuir MEJD Maia.
Membru governu nee akresenta, hanoin iha primeira faze nee, aleinde Atauro ba mos Metinaro, tanba iha planu uluk, primeiru nee ba Atauro, nee tenki haree uluk rai, estatutu rai, nunee mos Metinaro, tuir planu sidade Dili atu alarga ba Metinaro.
“Ita primeiru tenki assets (patrimóniu) uluk, ita identifika fatin neebe atu sai, tanba nee tenki haree rai, Eskola Cafe iha Munisipiu hotu inklui RAEOA, normalmente ita kuandu aumenta tan, nee ita sei aumenta tan profesores, nee konserteza no laiha duvida, agora daudaun iha faze konstruksaun, ida mak Kovalima, Ainaro, Likisa, Lautem no Vikeke seidauk, tanba sei hein hela rai, durasaun tempu ba asina ohin loron nee tinan lima,” nia afirma.
Nia hatutan, asina kooperasaun bilateral entre MEJD TL ho MEJD Portugal liu-liu ba iha projetu Eskola Cafe, oinsa mak ba oin bele espande iha postu administrativu iha teritoriu laran, bainhira Eskola Cafe aumenta, nee presiza aumenta mos professores.
(jac)
