MEJD Halo Pagamentu Retroativu 65 %

DILI, STLNEWS.co – Ministeriu Edukasaun Juventude no Desportu (MEJD) halo ona pagamentu retroativu kuaze 65 % ba profesores sira.

Kestaun nee hatoo husi Diretor Jeral Administrasaun Jestaun no Finansas husi MEJD, Antoninho Pires ba STL iha nia knaar fatin, Sesta nee (23/06/2023).

“Ami bele dehan katak, ami halo ona retroativu nee hahu iha tinan 2021 ho tinan 2022, nee ami halo ona pagamentu 65%, sei hela deit 20% ital mak sei iha prosesu nia laran, sura ba numeru karik 4 mil ital profesores mak hetan ona retroativu, no mil ital mak seidauk hetan retroativu, balun neebe mak seidauk hetan retroativu nee depende ba orsamentu no prosesu neebe mak lao,” dehan Pires.

Antoninho dehan, karik profesores balun neebe mak seidauk hetan osan ida nee, tanba MEJD sei haree ba orsamentu neebe iha, inklui haree ba iha ninia prosesu neebe mak sei lao, maibe hirak neebe seidauk halo pagamentu, tanba buat hotu sei iha prosesu.

“Ita espera katak, numeru profesores neebe mak seidauk hetan osan ida nee, too tempu ita nian profesor sira sei hetan nafatin osan ida nee, tanba nee sira nia direitu ba osan retroativu nee sei la lakon ida,” dehan nia.

Iha fatin seluk, koordenadora EBF Naroman, Rosinha Monteiro dehan, konaba osan retroativu ida nee tama iha profesores idak-idak nia konta bankaria, tanba nee profesores hira mak hetan ona osan ida nee no hira mak seidauk hetan.

“Hau hanoin konaba retroativu nee tama iha konta bankaria profesor ida-idak nian, entaun oinsa mak ita bele hatene ita nian profesores hira mak hetan ona no hira mak seidauk hetan osan ida nee,” katak nia.

Entretantu, profesora husi Pre Eskolar Sagrada Familia, Beatriz da Silva dehan, retroativu ida nee profesores permanenti sira mak hetan, maibe ba hirak neebe sei kontratu la hetan osan nee.

“Hau senti ami la hetan osan ida nee, tanba osan retroativu nee ita nian profesores permanenti sira mak hetan, tanba ami nee profesor sei kontratu hela, bainhira ita tama ona permanenti mak bele hetan osan ida nee,” nia afirma.

(jac)

LEAVE A REPLY

Please enter your comment!
Please enter your name here