Membru Governu Foun Tenki Komprende Halo Jestaun

DILI, STLNEWS.co – Husu ba partidu vensedor CNRT iha eleisaun parlamentar 2023 nee, atu tau ema neebé komprende halo jestaun, liu-liu iha kargu Ministru Ensinu Superior.

“Husu ba governu ba oin nee, IX Governu nee liu-liu iha Ministeriu Ensinu Superior haruka ema neebe asumi kargu nee tenki komprende politika ensinu superior, para bele investe iha ensinu superior neebe sai sub primariu no sai parseiru nee tenki halo jestaun no politika neebe diak, prepara kondisaun hotu, no obriga ensinu superior hasae sira nian produsaun, liu-liu konaba peskiza sira, hakerek livrus,” dehan Reitor UNPAZ, Adolmando Soares Amaral ba STL Kuarta nee (31/05/2023).

Tuir Adolmando katak, hanesan ensinu superior privadu ida, iha esperansa katak, se IX Governu nee, Ministeriu Ensinu Superior nee hamutuk ho Ministeriu Edukasaun ka ou nafatin Ministeriu Ensinu Superior, tenki iha ministeriu ida neebe komprende jestaun no politika ensinu superior nian.

“Laos deit tanba ministru nee tenki komprende halo jestaun iha ensinu superior, neebe ema neebe asumi pasta ida nee tempu tuir mai tenki ema neebe komprende duni politika no jestaun ensinu superior nian, ida nee ita nia esperansa,” nia informa.

(jac)

LEAVE A REPLY

Please enter your comment!
Please enter your name here