DILI, STLNEWS.co – Ministru Ensinu Superior Siensia no Kultura (MESSK), Longuinhos dos Santos fo tomada de pose ba Jose Cornelio Guterres, neebe re-eleitu ba Presidente Konselhu Ezekutivu Institute Nasional Ciensia Teknolojia (INCT), ba periodu 2023 too 2027.
Liafuan nee haktuir husi Ministru Ensinu Superior Siensia no Kultura (MESSK), Longuinhos dos Santos ba jornalista iha tower Fatuhada, Dili, Tersa nee (18/04/2023).
“Fo onra ida mai hau hodi partisipa iha serimonia tomada de pose ba segundu mandatu ba Presidente Konselhu Ezekutivu INCT ninia. Hahu iha tinan 2019, INCT kria ona kondisaun neebe diak. VIII Governu Konstitusional hau simu tomada de pose iha tinan 2018, hau observa ba INCT, realidade INCT importante. Kuandu hau observa iha buat rua neebe sai hanesan dezafiu boot ida mak mukit rekursu umanu, ida seluk mak mukit finansiamentu. Buat rua nee hau nian prezensa, hau tau konsentra masimu,” dehan Longuinhos.
Nia dehan ,mai iha INCT konsege estabelese orgaun diretiva INCT ninia, no tau orsamentu masimu ba INCT atu bele promove dezenvolve peskiza iha area teknolojia ninia, dala ida tan hakarak hatoo parabens ba Prezidente INCT,Visi INCT no funsionariu sira nian servisu neebe diak, no konsege lori INCT ba oin.
Entretantu, Prezidente Konselhu Ezekutivu INCT, Jose Cornelio Guterres dehan, INCT nudar institutu publiku ida neebe harii bazea ba dekretu governu numeru 23/2014 no hetan alterasaun ho no 5/2023,8 de Marsu ho misaun atu kontinua promove siensia, teknolojia no inovasaun avansada, publikasaun, desiminasaun no katalogasaun material sientifiku sira iha TL.
“Ohin ita halo tomada de pose ba hau ata nudar Prezidente Konselhu Ezekutivu INCT nian, depois de hetan re-eleitu husi konselhu jeral iha dia 12 Abril liu ba, tuir estatutu INCT, depois loron tolu prezidente ezekutivu eleitu tenki hetan tomada de pose husi prezidente konselhu jeral. Iha serimonial ida nee, nudar momentu importante ida hodi simu knaar atu halao misaun INCT nian ho responsabilidade no profisional,” dehan nia.
Nia dehan, servisu balun neebe INCT halao ona durante tinan haat, iha ninia mandatu 2019-2023 liu ba no programa sira neebe sei halo iha mandatu tuir mai, atu garante nafatin misaun INCT nian, primeiru husi atividade peskiza, tantu peskiza puru no aplikada neebe INCT koopera ho IES sira, konsege halo ona 35 projetu peskiza (7 iha 2019,16 iha 2021,no 12 iha 2022)ho total orsamentu US$ 250,000,00 husi total orsamentu US$ 1,712,444,00 ba alokadu ba INCT 2019-2022.
(jac)
