MESSK Husu Tekniku Halo Servisu Rigor

DILI, STLNEWS.co – Ministeriu Ensinu Superior Siensia no Kultura (MESSK) husu ba tekniku sira atu halo servisu rigor ba koreksaun pontu ezame rejime jeral no espesial ba asesu Universidade Nasional Timor Lorosae (UNTL) no Institutu Publiku Betano (IPB).

“Ohin halo lansamentu koresaun asesu ba UNTL no IPB, ohin hau hatete ba tekniku sira atu servisu ho rigor, nomos transparente, tanba nee mak ohin ita boot sira asiste iha makina reprezenta husi Ministeriu, MAE, asuntu veteranus, Ministeriu Sosial no Ministeriu Edukasaun, nomos MESSK, koreksaun ida nee kompostu husi ministeriu sira nee,” dehan Ministru Ensinu Superior Siensia no Kultura (NESSK), Jose Honorio da Costa Pereira Jeronimo ba jornalista iha edifisiu MESSK Colmera, Segunda nee (08/01/2024).

Nia dehan, hanesan ministru fo hatene ba tekniku sira halo servisu neebe rigor, tanba dala barak komunidade sira sempre tau kestaun ba asesu UNTL no IPB, maibe tinan ida nee hasae valor 46 ba leten, husi nee mai kraik nee labele asesu ba UNTL no IBP.

“Ita hakarak aposta ba kualidade, tanba UNTL ho IPB instituisaun estadu nian, nee tenki diak, atu nunee ita nian joven sira neebe iha, liu husi kriteriu neebe ministeriu fo sai liu husi komisaun simu estudantes foun, valor masimu nee too 60, uluk ita mai ho 45, maibe agora lae, tinan oin ita hasae ba too 47 ou 48, too tempu ida bele too 50 para ita hakarak aposta ba kualidade,” nia dehan.

Nia hatete, joven sira neebe tama iha UNTL no IPB nee, instituisaun estadu nian sira tenki halo aproveitamentu neebe diak, nunee aban bainrua bele kontribui ba rekursus umanus neebe ho kualidade, 10 mil resin estudantes, UNTL hakarak simu 4 mil resin, no IPB 400, tanba nee tenki tais halo didiak, ida neebe mak merese duni atu ba, ho nunee sosiedade labele tau iha kestaun.

Nunee mos Reitor UNTL, Joao Soares Martins dehan, numeru estudantes labele liu proposta neebe mak sira hatoo ba ministeriu, sira neebe melhores mak bele tama iha medisina jeral ninia, maibe ida nee komisaun mak desidi, no laos reitor mak desidi ida nee.

“Ami nian proposta mai 4.720, nee fahe ba fakuldade sanulu, no kursu quarenta tres, ida nee mak proposta neebe mak ami hatoo ba iha Ministeriu Ensinu Superior, ami espera katak ita sei la too iha situasaun nee,” tenik nia.

(jac)

LEAVE A REPLY

Please enter your comment!
Please enter your name here