DILI, STLNEWS.co – Meza no kadeira neebe iha armajen Ministeriu Edukasaun 2000 resin mak seidauk distribui, nee ba iha nivel pre-eskolar deit.
Lia hirak nee hatoo husi Diretor Infraestrutura Edukativas husi Ministeriu Edukasaun, Agostinho Soares,ba jornalista iha ME Segunda nee (10/7/2023).
“Ita boot sira hatene katak eskola iha teritoriu laran tomak hamutuk 1.898 eskolas, nee hahu husi nivel eskolar hotu-hotu. Tantu eskola publiku no privadu, agora husi numeru neebe mensiona kada tinan eskola la aumenta, maibe numeru estudante mak aumenta. Tanba nee mak fasilidade meza kadeira la sufisiente, nee tanba didikasaun husi numeru estudante sira,” nia komenta.
Agostinho akresenta, Ministeriu Edukasaun tau planu ba 2021 no 2022 ba meza no kadeira nee 20 mil pares. Mais 20 mil pares nee sira distribui hotu ona, sei iha tan 16 mil pares mak tau ona planu ba tinan 2024 nian.
“Programa nee IX Governu seidauk lori ba Parlamentu Nasional, maibe husi dirasaun infraestrutura prepara ona. Ita mos sei presiza tan 16 mil pares kadeira hodi distribui ba eskola sira,” haktuir nia.
Nunee mos Diretor Jeral Administrasaun Jestaun no Finansas husi Ministeriu Edukasaun, Antoninho Pires hatete, meza no kadeira sempre halo distribuisaun ba eskola neebe menus fasilidade, tanba husi parte ministeriu nafatin produs meza no kadeira.
(jac)
