DILI, STLNEWS.co – Ministeriu Edukasaun hamutuk ho parseiru nasional no internasional diskuti implementasaun programa tekniku, hodi foti dadus husi eskola primaria too eskola sekundaria iha teritoriu Timor Leste.
“Ami realiza workshop loron 5 hamutuk ho parseiru nasional no internasional Unicef koalia konaba oinsa atu implementa programa tekniku, hodi foti dadus husi eskola primaria too iha eskola sekundaria iha munispiu 14,” dehan Diretor Jeral Politika Planeamentu no Inkluzaun iha Ministeriu Edukasaun, Raimundo Jose Neto ba jornalista sira iha salaun JL -Villa Fatuhada, Segunda nee (24/07/2023).
Nia dehan, programa ida nee oinsa atu halo preparasaun tekniku SEA-PLM Ba Timor-Leste, oinsa atu prepara numerator sira hodi halo levatamentu dadus konaba implementasaun programa ida nee, oinsa atu halo survei ida ba estudante sira iha primeiru ano, hodi haree estudante sira nia kapasidade lee no hakerek iha prosesu aprendizajen ne’e to’o iha ne’ebé, tanba programa refere mundu hotu adopta, tanba Timor-Leste tama ona iha ASEAN, entaun presiza implementa programa edukasaun nee iha Timor-Leste.
“Atividade nee hahu iha tinan 2019, maibe tama iha tinan 2020 implementa tama fali iha Covid-19, entaun la implementa, maibe foin daudaun nee mak implementa fali programa nee iha tinan 2022-2024. Tanba nee mak iha tinan kotuk ita haruka grupu kiik ida ba tuir formasaun konaba mobilizador iha nasaun Tailandia, Filipina, Korea, fila mai iha Timor hodi implementa programa Eskola Iha Uma iha munisipiu 14,” nia afirma,.
Nia hatutan, atu nunee bele hatene lo-loos estudante hira mak hatene lee no hakerek, no estudante hira mak la hatene lee no hakerek, tanba nee mak Ministeriu Edukasaun iha planu implementa programa nee, hodi nunee ba futuru bele hatene lo-loos estudante hira mak hatene lee no hakerek.
Nunee mos Anyoah Deputy Country Representative UNICEF Timor Leste hatete, parabens ba Ministeriu Edukasaun neebe kontinua servisu hamutuk ho parseiru sira, hodi kontinua implementa programa nee iha mundu tomak inklui Timor Leste, hodi hadia aprendizajen iha sala laran, iha eskola primaria publiku no privadu iha Timor Leste, hodi dezenvolve sistema edukasaun liu husi prosesu aprendizajen neebe forti, hodi garante kualidade edukasaun iha futuru oin mai.
“Presiza halo monitorizasaun ba prosesu aprendizajen hodi dezenvolve politika, ho nunee bele kontribui ba iha nasaun neebe dezenvolve signifikativu iha rejiaun hotu hotu. Tanba nee mak UNICEF halo avaliasaun ba rezultadu aprezentasaun husi estudante sira nian iha klase 5, programa ida nee iha pilar tolu mak jeneraliza dadus komparasaun, indikador, no halo analiza komparasaun prosesu aprendizajen kontestu iha edukasaun baziku liu husi observasaun tuir estudu sira seluk,” nia esplika.
(jac)
