DILI, STLNEWS.co – Ministeriu Edukasaun iha planu sei halo rekrutamentu guarda eskola ba ensinu baziku iha teritoriu Timor Leste.
“Konaba rekrutamentu ba guarda eskola, ami nia planu manual neebe mak prepara ona, maibe planu ida nee ami sei hatoo ba iha ministra. Rekrutamentu ba guarda eskola seidauk, iha tinan kotuk nee ami preparadu ona, maibe too agora seidauk. Ami kontinua planu nafatin hodi hatoo ba ministra atu foti desizaun,” dehan direitor Jeral Administrasaun Jestaun no Finansas husi Ministeriu Edukasaun, Antoninho Pires ba jornalista iha Ministeriu Edukasaun Vila-Verde, Kinta nee (06/07/2023).
Antoninho dehan, ministra hakarak atu aumenta pesoal guarda eskolar ka lae. Maibe realidade planu sira kontinua halo, planu ida nee ba gropu ensinu baziku deit mak iha proposta ida atu bele rekrutamentu ba guarda eskolar sira. No eskola Sekundaria balun neebe indentifika atu kolaka guarda eskolar.
Iha fatin seluk, Kordenador Pre Eskolar Sagrada Familia, Cornelio Antonio Soares hatete, too ohin loron sira seidauk iha guarda eskola, maske durante nee sira halo ona proposta ba Ministeriu Edukasaun, maibe too ohin loron seidauk iha resposta ruma.
“Ami hakarak ami nian eskola nee iha guarda eskola, atu nunee bele halo kontrolu ba ami nian eskola ida nee, maibe hau hanesan kordenador halo ona proposta ba Ministeriu Edukasaun, maibe dehan sei tau prioridade ba ensinu baziku sira, ba pre eskolar seidauk,” nia dehan.
Cornelio afirma, tuir lo-loos eskola sira nee tenki iha guarda eskola, ho nunee bele haree sasan hirak neebe iha eskola, maibe konaba asuntu ida nee husu ona ba ministeriu, maibe seidauk iha resposta ba asuntu refere.
(jac)
