DILI, STLNEWS.co – Ministeriu Edukasaun rekohnese inspetor eskolar sei menus, presiza aumenta hodi bele kobre eskola sira iha teritoriu laran.
Asuntu nee hatoo husi Diretor Jeral Administrasaun Jestaun no Finansas iha Ministeriu Edukasaun, Antoninho Pires ba STL iha nia knaar fatin, Sesta nee (07/07/2023).
“Kuandu ministra aseita ba numeru inspetor sira neebe iha munispiu. Planu sira nee sei hatoo ba ministra, depois mak ministra desidi atu aumenta numeru inspetor sira ka lae, kuandu ministra aseita ba numeru inspetor sira neebe iha munispiu sira,” dehan nia.
Antoninho hatete, planu rekrutamentu ba inspetor foun sira iha VIII Governu la konsege rekruta, tanba orsamentu laiha, tanba nee iha tinan ida nee, planu ministeriu nian atu rekruta inspetor foun sira, maibe depende ba ministra nia desizaun atu aumenta ka lae, total inspetor eskola hamutuk 90 ital inspitores, ba pre-eskolar nian hamutuk 100 resin inspitor eskola sira.
“Tanba nee, Ministeriu Edukasaun presiza tau numeru inspetor sira tanba seidauk sufisiente. Tanba ita hotu hatene katak, eskola barak iha munispiu, inspetor balun iha eskola ida deit, ho ida nee ministeriu iha planu ba tinan ida nee atu aumenta tan, hodi bele konbertura iha eskola sira nee,” dehan nia.
Iha fatin seluk, kordenadora EBF Naroman, Rosinha Monteiro hatete, inspetor eskolar sira mai halo inspesaun iha eskola ida nee, liu-liu haree ba ensinu aprendizajen iha sala de aula, inklui haree implementasaun programa merenda eskolar.
“Hau hanoin ita nian inspetor sira sempre mai halo inspesaun iha eskola ida nee, liu-liu haree atividades ensinu aprendizajen ba ita nian estudante sira iha sala de aula, nunee mos programa merenda eskolar,” nia informa.
(jac)
