DILI, STLNEWS.co – Diresaun Nasional Planu no Inkluzaun (DNPI) halo ona monitorizasaun ba eskola 20 remata ona, iha Munisipiu Baukau no Lautem.
Informasaun nee hatoo husi Xefi Departamentu Edukasaun Inkluzivu iha Ministeriu Edukasaun, Jose Monteiro ba STL iha nia knaar fatin, Tersa nee (18/07/2023).
“Halo monitorizasaun eskola hamutuk 20, 10 iha Baukau no 10 iha Lautem, neebe mak momentu sira halo tiha ona formasaun iha fulan Abril, depois iha fulan Maiu liu ba sira ba halo observasaun sala de aula, oinsa mak profesor sira neebe simu ona formasaun nee implementa duni iha sala de aula ka lae, nee tuir duni saida mak sira simu ona husi formasaun nee ka lae, karik iha sala de aula nee labarik defisiensia ruma iha karik, sira nian hatene nee oinsa,” dehan nia.
Jose dehan, programa tuir fali mai nee halo tan programa, maibe enjeralmente profesores sira husi eskola 20 nee, 10 iha Baukau no 10 iha Lautem, maibe iha Baukau kuaze profesores 40 nunee mak partisipa, Lautem mos hanesan professores 40, neebe husi munisipiu rua Baukau ho Lautem nee profesores hamutuk 80.
“Iha eskola 20 mak sira halo tiha formasaun, depois halo tan monitorizasaun nee iha duni progresu, tanba rezultadu husi formasaun nee sira implementa duni iha sala de aula nee oinsa, tuir duni saida mak sira simu iha formasaun nian laran ka lae, maibe monitorizasaun ba eskola 20 hotu ona,” katak nia.
Iha fatin seluk, Rui Manuel Miranda da Costa nudar Diretor Servisu Eedukasaun Munisipiu Lautem dehan,los katak sira mai duni, nee hanesan projetu pilotu ida, tanba sira mai aprejenta deit, no sira ba liu iha baze halo monitorizasaun ba ensinu baziku.
“Los duni katak sira mai aprejenta deit ba liu iha baze, tanba sira halo monitorizasaun ba ita nian ensinu baziku,” nia afirma.
Nunee mos Diretor Servisu Eedukasaun Munisipiu Baukau, Augosto Ornai Ximenes la responde asuntu nee, tanba okupadu ho servisu.
(jac)
