DILI, STLNEWS.co – Implementasaun menu programa merenda eskolar ba tinan ida nee iha mudansa, tanba estudantes laos han deit etu, maibe ho aifuan.
Kestaun nee hatoo husi Luisa Amelia Florindo Reis, hanesan Gabineti Apoiu Tekniku (GAT), EBC Manleuana ba STL liu husi telefone, Domingu nee (07/05/2023).
“Implementasaun merenda eskolar nee kada loron iha ami nian eskola kontinua lao ho diak, tanba kada loron ami nian estudante sira sempre asesu diak ba programa merenda eskolar, tanba agora ita mudansa, uluk ita nian estudante sira han deit etu, agora kada loron tenki han ho aifuan,” dehan nia.
Luisa dehan, total estudantes husi EBC Manleuana hamutuk 1908, uluk estudante ida han osan kuarter, agora sae ba 42 sentavu, entaun menu merenda eskolar ba tinan ida nee la hanesan ho tinan hirak liu ba, maibe tinan ida nee mudansa ba menu merenda eskolar.
“Ami nian merenda eskolar nee ami implementa dezde iha loron 02 fulan Abril foin lalais nee, too agora programa refere lao diak tebes iha ami nian eskola, tanba kada loron ami nian estudantes sempre asesu merenda eskolar,” nia dehan.
Iha fatin seluk, Direitor Jeral Administrasaun Jestaun no Finansas husi MEJD, Antoninho Pires dehan, asuntu merenda eskolar nee diak liu halo intervista ho MAE, maibe husi MEJD nafatin halo kontrolu programa refere ba eskola sira.
“Hau senti ita nian programa merenda eskolar lao hela iha eskola sira diak, ita boot sira halo intervista ho MAE, husi parte ami nian nafatin halo kontrolu,” tenik nia.
Entretantu, bainhira STL tenta atu halo intervista ho Direitor SEM Dili, Carlito da Silva, maibe la konsege tanba la atende telefone.
(jac)
