DILI, STLNEWS.co – Bainhira atu fo nutrisaun neebe diak ba estudantes sira, menu merenda eskolar ba tinan ida nee hahu mudansa, tanba kada loron estudantes sira laos han deit etu, maibe han ho aifuan.
Koordenador EBF Fatumeta, Reinaldo Pereira hatete ba STL iha nia knaar fatin Fatumeta, Segunda nee (17/04/2023).
“Merenda eskolar kada loron estudantes sira han aifuan hanesan aidila ho hudi deit, estudantes sira tuku sanolu sira tenki han ona, hau senti implementasaun merenda eskolar nee data mak hau ladun lembra, maibe foin halao semana ida ho balun nia laran, total estudantes hamutuk 935, neebe ami fahe ba turnu rua, menu nee kada loron la hanesan, Sesta mak han fore mungu,” tenik nia.
Nia dehan, agora ema neebe tein merenda eskolar ba ita nian estudantes sira, uluk nain 4, maibe agora nain 6, tanba depende ba total estudantes, tinan ida nee menu ba programa merenda eskolar iha mudansa oituan, tanba kada loron aifuan nee sempre iha, hanesan aidila tasak, tanba uluk nee etu los deit, aifuan laiha, aifuan neebe kada loron ita nian estudantes sira han mak hanesan aidila, hudi, maibe balun pateka, nee ita sosa labele, tanba osan, tanba kada estudantes quarenta sentavus, ita sosa sasan ho foin boot, nee osan la sufisiente,”
Iha sorin seluk, Estela Pereira hanesan ema neebe tein hahan merenda eskolar dehan, merenda eskolar nee sira mak jere osan nee, tanba nee sira labele sosa gas, tanba gas ida ema faan ho folin US$ 40 resin. Depois nee tein sanan ida deit, agora seluk nee bainhira. Entaun sira tenki tein uza deit ai sunu, kada semana sira sosa ai maran US$ 60 ou US$ 80.
“Hau senti dader tuku lima ami tenki mai tein ona, iha nee ami nain 6 mak prepara hahan ba ita nian estudantes sira, los duni katak menu merenda eskolar ba tinan ida nee la hanesan ho tinan hirak ba kotuk, tanba tinan nee ita nian estudantes sira han ho aifuan,” nia dehan.
Hatan ba asuntu nee, Diretor Diresaun Nasional Asaun Sosial Eskolar (DNASE), Joaquim Martins liu husi telefone hatete, implementasaun merenda eskolar nee kompetensia MAE, maibe atu hatene klean ba asuntu ida nee, diak liu halo intervista ho parte MAE ninia.
“Hau husu ita boot sira diak liu halo intrvista ho parte MAE ninia, ho nunee ita labele halo konfuzaun ba asuntu nee,” dehan nia.
(jac)
