DILI, STLNEWS.co – Ministeriu Edukasaun (ME) simu ona autorizasaun husi Komisaun Funsaun Publiku (KFP), hodi bele halo prosesu pagamentu ba profesores kontratu, neebe antes nee asina ona kontratu iha governu anterior.
Kestaun nee hatoo husi Direitor Jeral Administrasaun Jestaun no Finansas husi ME, Antoninho Pires ba STL iha edifisiu ME, Vila-Verde, Kuarta nee (09/08/2023).
“Autorizasaun husi KFP iha ona para halo prosesu pagamentu ba ita nian profesores kontratu sira iha fulan Agostu nian laran, pagamentu hotu atu implementa nee ami sei haree ba iha giaun neebe ami sei halo konaba atu implementa dekretu lei no 31, sei halo giaun ida, depois mak bele haree fila-fali,” katak nia.
Nia dehan, pagamentu neebe atu halo ba profesores kontratu nee hetan autorizasaun husi KFP, nee too fulan 6 ninia, tanba numeru neebe ohin mensiona nee, sira kontratu dala ida primeiru faze ninia, neebe mak asina kontratu iha governu anterior ninia tempu.
“Ami garante katak, hetan ona autorizasaun husi KFP, entaun ami garante katak, iha fulan Agostu nian laran ami sei halo pagamentu ba ita nian profesores kontratu sira, kuaze 1.499,” tenik nia.
(jac)
