DILI, STLNEWS.co – Ministeriu Edukasaun (ME) ho banku halo ona pagamentu ba benefisiáriu bolsa meritu kuaze rihun 9, maibe rihun 2 ou 3 seidauk iha konta bankaria hodi asesu ba bolsa ida nee.
“Hau hanoin pagamentu ba bolsa meritu nee ba 13 mil benefisiáriu, maibe 9 mil mak hetan ona prosesu pagamentu ba sira nian direitu nee. Agora 2 mil ou 3 mil mak seidauk iha konta bankaria, sira nee hein para atu bele iha prosesu seluk, atu nunee bele selu sira nian direitu. Too Horiseik ami halo ona segunda faze ho banku. Neebe kuaze besik rihun 9 ona,” dehan Direitor Jeral Administrasaun Jestaun no Finansas husi ME, Antoninho Pires ba STL iha nia knaar fatin, Kinta nee (31/08/2023).
Nia dehan, tempu nee sei estende ba benefisiáriu sira, tempu nee fo iha Setembru nian, ho sira trata dokumentus, para bele hetan konta bankaria.
“Ita fo tempu iha fulan Setembru nian laran ba BBM sira bele trata sira nian dokumentus, para sira bele hetan konta bankaria hodi bele asesu ba bolsa ida nee. Ho ida nee ME nasional sei fo nafatin informasaun ba servisu edukasaun munisipal sira,” nia dehan.
Pires afirma, benefisiáriu bolsa meritu sira nee kompostu husi nivel ensinu baziku, tekno, sekundariu jeral no ensinu pre eskolar la hetan bolsa ida nee, karik benefisiáriu bolsa meritu sira kontinua la trata dokumentus, entaun sira sei la asesu ba bolsa ida nee, no osan fila fali ba kofre estadu. Total benefisiáriu bolsa meritu hamutuk rihun 13, nee husi nivel hotu iha teritoriu laran. Balun hetan ona direitu ida nee, maibe balun too agora sseiduk trata sira nian dokumentus.
Nunee mos Koordenador EBF Hans-Klemm Bairo Pite, Flaviano da Costa de Jesus dos Santos hatete, iha EBF nee estudantes nain tolu mak seidauk simu sira nian osan ba bolsa meritu ninia.
“Ita nian estudantes nain tolu mak sira nian osan seidauk tama, tanba sira nian dokumentus seidauk prepara, entaun sira seidauk simu osan ida nee, maibe husi parte eskola nian husu ita nian estudante sira hatama ona sira nian dokumentus para bele hetan osan ida nee. Nee duni nain 3 nee hatama tiha ona sira nian dokumentus para bele hetan konta bankaria husi banku,” dehan nia.
Entretantu, Diretor SEM Manatuto, Graciano de Jesus Baptiste hatete, asuntu ida nee husu ba ME nasional, tanba husi munisipiu haruka ona ba nasional, nee husi nasional nia kompetensia.
(jac)
