DILI, STLNEWS.co – Salariu ba profesores kontratu hein Komisaun Funsaun Publiku (KFP) hasai desizaun para bele halo pagamentu ba profesores neebe asina ona iha governu anterior.
Lia hirak nee hatoo husi Direitor Jeral Administrasaun Jestaun no Finansas husi Ministeriu Edukasaun, Antoninho Pires ba jornalista sira iha sala konferensia Ministeriu Edukasaun Vila-Verde, Kinta nee (20/07/2023).
“Agora daudaun iha ona prosesu, Komisaun Funsaun Publika atu bele halao ona prosesu pagamentu, hein deit agora komisaun atu hasai desizaun ida para bele halo pagamentu ba profesores kontratu sira, agora ita hein husi komisaun sei fo sai informasaun,” nia afirma.
Pires dehan, konaba profesores reklamantes sira nee agora tama ona iha prosesu final, tanba iha mudansa ba governasaun, entaun tenki lori fali rezultadu ida nee ba iha ministra, ho nunee bele hola desizaun, agora daudaun sira sei halo hela prosesu hodi finaliza rezultadu nee hatoo ba iha ministra ho sekretariu estadu.
“Konaba reklamantes sira, ita sei lori rezultadu nee ba ministra para bele foti desizaun, neebe ninia rezultadu ikus nee ita finaliza tiha ona, no hein lori ba iha ministra, tanba nee ministra mak sei hola desizaun,” komenta nia.
Iha fatin seluk, Direitor EBC Fatumeta, Feliciano da Costa Gusmao hatete, too ohin loron profesores kontratu sira nee sira nian salariu seidauk tama, maski sira asina ona kontratu, maibe sira seidauk hetan salariu.
“Hau hanoin ami nian profesores kontratu hirak nee asina ona kontratu, maibe sira nian salariu seidauk tama, maski iha fulan hirak liu ba sira asina ona kontratu husi governu anterior ninia,” tenik nia.
Feliciano dehan, tuir deklarasaun husi Komisaun Funsaun Publika sei rezolve iha fulan Agostu, maibe ida nee sira nian kompetensia atu haree ba iha asuntu ida nee, tanba profesores hirak nee asina ona kontratu.
(jac)
