BOBONARO, STLNEWS.co – Primeiru Ministru Taur Matan Ruak hamutuk ho Ministru Edukasaun Juventude no Desportu (MEJD), ofisialmente inaugura projetu komunitaria ba konstrusaun eskola segunda faze hamutuk 59 iha Postu Administrativu Maliana Vila, Munisipiu Bobonaro.
Liu husi diskursu, Primeiru Ministru Taur Matan Ruak kontenti ohin mai iha fatin nee, hodi inaugura ba eskola 59.
“Iha tinan 2023 governu esforsu hodi halo kompleta fasilidade eskola, kadeira, meza no biblioteka hodi fasilita estudante sira atu asesu ba edukasaun neebe dignu hodi prepara aan kompete iha futuru,” tenik PM iha ESG Dom Martinho Maliana Vila, Munisipiu Bobonaro, Segunda nee (17/04/2023).
Aleinde nee, nia mos promete sei hadia infraestrutura baziku rekruta profesor kontratadu ba permanente no hadia fasilidade eskola, kria laboratoriu foun no harii haris fatin no halo kozina hodi hein hahan merenda eskola iha eskola iha territóriu laran tomak.
Nia dehan, estudante iha eskola rurais hasoru dezafiu mak menus fasilidade kadeira no mesa, entaun obriga sira tuur iha rai hodi tuir prosesu aprendizajen iha sala laran.
Xefi Governu nee informa, tanba nee mak oitavu governu nafatin esforsu hodi kria kondisaun neebe diak iha setor edukasaun liu husi mandatu oitavu governu, liu husi MEJD hodi kria kondisaun diak iha setor edukasaun nian.
“Hau hakarak iha mandatu tenki hadia infraestrutura baziku no kria fasilidade neebe diak, nunee tinan 10 mai ita bele atinji, presiza kria nesesidade liu husi eskola ba estudante sira”, tenik PM.
Iha fatin hanesan, Ministru Edukasaun Juventude no Desportu Armindo Maia hatete, hafoin inaugurasaun primeira faze ba konstrusaun no reabilitasaun eskola hanutuk 99 iha loron 27 Janeiru iha Munisipiu Baucau.
“Ohin ita hamutuk iha fatin ida nee hodi inaugura tan ita nia edifisiu eskola neebe mak halo konstrusaun no reabilitasaun ba segunda faze nian hamutuk 59 iha territoriu laran tomak,” katak nia.
Governante nee dehan, ho ida nee MEJD kontinua halo esforsu tomak hodi kompleta obra iha territoriu tomak.
Tanba nee, ohin MEJD inaugura tan segunda faze ba eskola hamutuk 59, husi numeru nee sira reabilita eskola 1, no halo konstrusaun foun hamutuk 58, ho sala aula hamutuk 191, haris fatin 36, sala profesor 21, eskritoriu 6, kozina 8, laboratoriu ETI 2 no moru 2.
Nia akrsenta, orsamentu neebe MEJD ezekuta ona hodi halo obra nee ho montante US$ 6.4 milhoens.
Entretantu, Diretor ESG Dom Martinho Maumali Maliana, Abel Sarimau agradese ba Ministeriu Edukasaun Juventude Desportu, tanba bele inaugura ona eskola no hili Dom Martinho hodi sai hanesan uma nain.
“Agradese ba MEJD neebe hili Dom Martinho sai uma nain hodi reprezenta eskola 59 hodi inaugura iha fatin nee,” dehan nia.
(mar)
