PM Husu ME Rezolve Profesores Kontratu

DILI, STLNEWS.co – Ohin Primeiru Ministru (PM) Kay Rala Xanana Gusmão akompanha profesores kontratu 2023 ba Ministeriu Edukasaun (ME), no husu atu rezolve problema profesores kontratu.

Primeiru Ministru Kay Rala Xanana Gusmão konsidera, profesores iha misaun ida atu servi povu Timor Leste liu husi saida mak profesor sira iha tenki fo hotu, atu hadia futuru rai ida nee nian, lori jerasaun foun sira sai labarik neebe iha kualidade. Maibe iha programa IX Governu nian liu husi polítika Ministeriu Edukasaun nian atu esklui profesor 1.400 resin husi sira ninia misaun, nee xefi governu mai hodi husu ba Ministeriu Edukasaun atu buka rezolve problema profesor sira nee nian.

“Agora hau mai iha ME nee, maibe ministra laiha, tanba sei halao hela ninia servisu iha munisipiu. Nia hatene ona hau iha nee, maibe hau la obriga nia atu mai lalais tanba tenki kuidadu ninia vida. Maibé hau husu ona ba nia molok fulan ida nee remata tenki rezolve ona problemas profesor kontratadu 1.400-resin neebe hetan ona ameasa atu esklui husi sira ninia misaun,” dehan PM Xanana ba jornalista sira, bainhira akompanha profesores kontratu ba ME, iha Vila Verde, Kuarta nee (29/11/2023).

Xanana dehan, asuntu ida nee pertinente tebes, tanba kuaze labarik lubuk ida iha eskola sira mak hein hela profesor sira ninia prezensa, atu lori sira iha prosesu aprendizajen nia laran.

Tan nee, husu ba ME tenki buka solusaun ida neebe diak liu, duke tenki esklui profesor sira husi sira nia misaun.

PM Xanana mos enkoraza profesor rihun ida resin neebe hetan ona ameasa atu esklui nee lalika hanoin barak, tanba husu ona ME atu rezolve sira nia problema, hahu agora ba oin kontinua ba halao servisu hanorin ho didiak no responsabilidade hodi bele garante labarik sira ninia progresu iha futuru, nee duni husu ba ministra atu buka rezolve asuntu profesor sira nee ho lalais, hodi nunee ba tinan foun nee ministeriu bele eselera politika ida hodi hadia kualidade ba profesor sira.

(jac)

LEAVE A REPLY

Please enter your comment!
Please enter your name here