PR Horta Husu Estudante JSU Kontinua Estuda Prepara Futuru

DILI, STLNEWS.co – Prezidente Republika (PR) Jose Ramos husu estudante JSU  João Saldanha University  nomos estudante hotu kontinua estuda, nunee prepara ba futuru, tanba nasaun iha joven nia liman.

Prezidente Republika Jose Ramos Horta hatoo kestaun nee liu husi diskursu bainhira partisipa iha serimonia gradusaun ba estudante JSU João Saldanha University, Segunda (15/01/2024) hatete, hatoo parabens ba estudante sira neebe ohin halo ona graduasaun.

“Mensajen ba imi graduadu sira, primeiru bainhira hau koalia ba joven sira hau hatete beibeik mensajen simples estuda, estuda, estuda, lalika lakon tempu ho buat seluk, iha Timor ita laos situasaun hanesan iha Fransa ou hanesan iha rai balun, ho razaun manifestasaun loron loron,” katak PR Horta.

Prezidente Republika hatete, nia observa katak joven barak mak halo manutensaun loron tomak ho konteni, maibe situasaun lao nafatin hanesan baibain, tanba nee PR enkoraja joven sira diak liu estuda. Horta enkoraja diak liu estuda, estuda, estuda, tanba nia rona beibeik futuru pertense ba joven sira, tanba nee estuda sai matenek hodi troka jerasaun tuan sira iha futuru mai, tanba nee estuda klean no estuda loron loron labele para estuda.

“Apela joven sira estuda siensia, estuda dizitalizasaun, estuda artefizitalen, estuda medisina, estuda ekonomia, estuda administrasaun, teolozia husik ba padre sira, tanba padre sira mak hatudu ba ita dalan ba lalehan oinsa, laos maufehuk sira la hatene nee mak mai hanorin fali hau konaba relijiaun, maibe hau konfia liu mak Papa, Bispu sira, Padre no Madre sira labele lakon tempu, la ba padre ba estuda fali teolozia, maibe imi foka ba siensia,” katak nia.

Nia hatutan, iha tinan 5 mai tan Timor Leste mos laiha ona osan, nota neebe ema kaer beibeik nee hotu-hotu ho dizitalizasaun, buat hotu selu husi telefone, tia sira husi merkadu Taibesi no Manleuana, no seluk tan hau apoiu sira avontade los, maibe polisia sira mak laiha servisu ba satia beibeik, maibe tinan mai sei hola repollu sasan husi dizitalizasaun.

“Tinan 5 nee haree oinsa mundu muda i ita muda, nee duni imi joven prepara ba futuru, los duni tinan 5 tinan 10 no 20 mai, jerasaun hahu 1975 too ohin se mak iha estrutura estadu nia, ami nai rua maun boot Xanana no hau rasik, hotu-hotu jerasaun foun, iha fatin hotu hotu,” katak nia.

Iha fatin hanesan, Fundador JSU, Joao Mariano Saldanha hatutan, bainhira loke universidade iha 2015, sira iha ona hanoin katak JSU hanesan universidade foun tenki diferente ho universidade seluk, oferese buat ketak ida, labele hanesan ho buat neebe universidade seluk oferese, no ninia graduadu sira mos ajuda komunidade rezolve problema laos deit iha nivel lokal, maibe mos iha nivel global.

“Ohin ita kontenti, tanba ita hetan hanoin barak husi sua exelensia Prezidente Republika, tanba nee graduasaun primeiru nee ita konvida Sua exelensia PR Horta hanesan nobel da Paz, atu hatoo diskusaun sientifiku, ami koalia oituan ho protokulu baibain PR hetan ona brifing ona ka seidauk, hau hanoin hetan brifing lo-loos pezu Prezidente Republika nee koalia ikus, maibe ami hatete katak nee ami konvida sua exelensia nee hanesan figura ida ke internasional, figura global ida, tanba nee diskursu iha sientifiku nee,” katak nia.

Fundador JSU hatutan, ohin halo graduadu dahuluk ba estudante baxarelatu S1 iha area ekonomia no bisnis, no JSU nia servisu hatudu progresu oituan seidauk barak, estudante nain rua husi departamentu ekonomia no bisnis neebe transfere kreditu ida 37 ba Amerika, no ida kreditu 30 ba Amerika nee katak servisu nee rekonhese ona, mezmu hetan difikuldade barak.

Nia hatutan, Kurikulum JSU nia aprezentasaun nee simples los, bele haree no monitor, maibe ninia ezekusaun nee mak rigorozu, rigorozu tanba hahu ho 0 Ano, no ba sira neebe tama iha universidade nee hotu hotu tenke aprende matematika, ingles ho estatístika.

(eme)

LEAVE A REPLY

Please enter your comment!
Please enter your name here