DILI, STLNEWS.co – Oras nee daudaun Edukasaun Ensinu Pre Eskolar 159 hetan ona lisensiamentu, balun sei iha prosesu nian laran.
Lia hirak nee hatoo husi Diretor Nasional Pre Eskolar iha Ministeriu Edukasaun, Tomas Perreira ba STL iha JL-Vila Fatuhada, Segunda nee (24/07/2023).
“Iha ita nian ensinu edukasaun pre eskolar nee balun tenki hamutuk duni ho ensinu baziku, jestaun nee bele ketak, tanba jestaun ba pre eskolar ketak no ensinu baziku ketak, edukasaun pre eskolar neebe mak hetan ona lisensiamentu nee hamutuk 150 mak hetan ona lisensiamentu, maibe hein fali seluk neebe atu hetan lisensiamentu nee sei iha prosesu nian laran,” tenik nia.
Nia dehan, sira nian edukador sira nee balun sei voluntariu, permanenti no balun sei kontratu, maibe sira nian fasilidade ba ensinu aprendizajen nee sufisiente hela ba estudante sira, tanba pre eskolar hotu-hotu hetan fasilidade no prosesu aprendizajen hanesan, numeru neebe ohin mensiona nee iha teritoriu laran tomak.
“Hau hanoin ninia edifisiu mak iha tipu diferente, maibe ninia aprendizajen prezensial nee sufisiente,” katak nia.
Iha parte seluk, Koordenadora Pre Eskolar Moris Foun, Domingas Bratriz da Cunha dehan, sira preokupa ba sira nian edifisiu, tanba sira seidauk iha fatin, no duadaun nee sira uza resintus EBC Fatumeta, no sala sira nee lori kalen mak didin para fahe turma ba estudante sira.
“Ami nian sala nee uza kalen mak didin, ho nunee ami bele fahe turma ba ita nian estudante sira,” dehan nia.
(jac)
