DILI, STLNEWS.co – Profesores kuaze 700 too 800 seidauk hatama karta rekerimentu, maibe balun hatama daudaun ona.
Lia hirak nee hatoo husi Diretor Jeral Administrasaun Jestaun no Finansas husi MEJD, Antoninho Pires ba STL, Kinta nee (29/06/2023).
“Konaba reforma profesores ninia, ami seidauk iha dadus konkretu, tanba dadus neebe ami iha rekursu umanus nee kuaze 700 ou 800 profesores neebe tama ba idade reforma ninia, maibe balun hatama ona karta rekerimentu, balun seidauk hatama, agora tama ona ba reforma, nee osan seluk husi INS. Husi numeru neebe ohin mensiona nee kompostu husi nivel ensinu pre eskolar, ensinu baziku, tekvo no sekundariu jeral,” nia informa.
Pires dehan, dadus hirak sira hetan husi Komisaun Funsaun Publika, tanba nee maski profesor sira nian idade tama ba reforma, maibe too ohin loron profesor sira nee seidauk hetan sertifikadu reforma ninia, maibe profesores balun hatama ona sira nian karta rekerimentu ba reforma ninia.
“Bainhira ita nian profesores neebe mak tama ba iha reforma ninia nee salariu kada fulan sei la hanesan ho ita nian profesores neebe tama ativu, tanba sira tama ona ba reforma salariu sei la hanesan. Maibe husi numeru neebe ohin hau mensiona nee, sira hotu idade ba ona reforma, maibe seidauk halo rekerimentu,” tenik Pires.
Antoninho hatete, durante nee parte husi Ministeriu Edukasaun servisu hamutuk ho Komisaun Funsaun Publiku, no dadus sira nee MEJD hetan husi KFP, maibe atu dehan profesores sira nee sei kontinua halao sira nian atividades hanesan profesores, neebe halao ensinu aprendizajen ba estudante sira iha eskola.
Iha fatin seluk, Direitor SEM Bobonaro, Crispin Lopes dehan, konaba profesores reforma nee dadus iha rekursu umanus, tanba nee sei konfirma lo-loos lai dadus iha rekursu umanus.
“Dadus hau ladun hatene, tanba ami nia dadus iha hela parte rekursu umanus, hein hau halo konfirma lai ho rekursu umanus, depois mak hau fo fali informasaun ba ita boot sira, semana oin nunee,” nia informa.
Entretantu, bainhira STL tenta atu halo intervista ho Diretor Rekursu Umanus husi MEJD, Justino Varela, maibe la konsege, tanba la atende telefone.
(jac)
