DILI, STLNEWS.co – Profesores neebe hanorin iha area espesifiku, nivel sekundariu no tekniku vokasional iha Munisipiu Vikeke menus.
“Hau hanoin enjeral nee ita nian profesores la sufisiente, ita nian profesores ba area espesifiku sira nee mos seidauk too, ba area espesifiku nee ita nian profesores barak mak seidauk iha, nee duni presiza halo levantamentu hodi rekruta profesores ba area espefiku sira nee,” dehan Diretor SEM Vikeke, Domingos Brandao ba STL liu husi telefone, Tersa nee (10/10/2023).
Domingos dehan, aleinde profesores ba area espesifiku, iha mos profesores ba ensinu baziku sira sei menus, tanba barak seidauk too, tanba nee ba ensinu baziku ninia mos profesores seidauk sufisiente.
“Ita nian profesores hahu husi nivel ensinu baziku mai too nivel sekundariu no tekvo, nee seidauk sufisiente, maibe oinsa mak iha levantamentu dadus nee bele halo rekrutamentu ba profesores neebe seidauk sufisiente,” nia komenta.
Nunee mos Diretor SEM Likisa, Carlos Lopes dehan, eskola sira iha Munisipiu Likisa sei menus profesores, tanba profesores balun mate, balun sira nia idade atu tama ona ba reforma, oinsa mak bele aumenta profesores.
“Ami menus profesores, tanba ami nian profesores balun mate, moras, balun sira nia idade tama ba reforma,” nia haktuir.
(jac)
