DILI, STLNEWS.co – Profesores husi Eskola Baziku Filial (EBF) Rumbia nain 10 tama ona idade reforma, maibe sira hein despaisu husi Ministeriu Edukasaun Juventude no Desportu (MEJD).
Haktuir profesora husi EBF Rumbia, Regina Rangel dos Santos ba STL iha nia knaar fatin, Kinta nee (30/03/2023).
“Agora daudaun tama ona ba idade 60, neebe hatama karta rekerimentu ami seidauk hatama, tanba ami sei hein despaisu husi leten tun mai dehan ami reforma, nee tenki reforma duni. Bainhira despaisu seidauk tun mai, ami sei kontinua halao knaar hanesan profesor hodi eduka estudantes sira,” nia dehan.
Nia afirma, too agora sira sei hein despaisu husi MEJD, tanba laiha informasaun sira kontinua halao funsaun hanesan baibain, tanba sira sei la abandona estudante sira nee, maibe oinsa mak aprendizajen kada loron nee lao diak nafatin.
Iha fatin hanesan, Koordenador EBF Rumbia, Abilio Pereira da Conceicao hatete, profesores nain 10 mak tama iha idade reforma, maibe too ohin loron sira seidauk hatama karta rekerimentu, tanba dehan sira nian idade nee sei bele hanorin nafatin estudante sira.
“Ami nian profesores nain 10 mak tama iha idade reforma, maibe too agora ami sei hein informasaun ruma husi ita nian ministeriu, karik iha informasaun nee ami bele tama ba reforma ona,” nia deklara.
Abilio akresenta, husi eskola nee profesores nain 10 mak tama ba idade reforma, agora numeru ida nee mak reforma dala ida, oinsa ho estudante sira nee, tanba kuaze nain 10 mak idade avansdu ona.
Entretantu, Diretor SEM Manufahi, Trinito Sarmento dehan, konaba reforma ninia, profesores balun hanorin hela, maibe sira nian idade nee ba reforma ninia, no balun hatama ona karta rekerimentu no balun seidauk hatama, tanba seidauk iha lei reforma obrigatoriu, ho nunee profesor sira nafatin halao sira nian funsaun.
“Baibain hau dehan ona, ita nian profesores neebe tama ba idade reforma nee balun hatama ona karta no balun seidauk hatama,” nia esplika.
(jac)
