Profesores Kontratadu La Aseita Partisipa Teste

DILI, STLNEWS.co – Profesores kontratadus tinan 2023 la aseita no la partisipa politika Ministeriu Edukasaun (ME), neebe obriga profesores atu tuir teste bolsa kandidatu ba 2024.

“Ami profesores kontratadus tinan 2023 aproveita okaziaun ida nee, dala ida tan hatoo ami nia pozisaun katak, ami la aseita no sei la partisipa politika ME neebe obriga ami profesores kontratu 2023 atu tuir teste iha tinan 2024, ho razaun ami la aseita no la partisipa teste, tanba antes ami hetan kontratu husi ME liu husi prosesu naruk ida no ami kostitui rekezitus barak neebe ME estabelese, no ami prienxe rekezitus sira. Nunee ami nian lista publika iha jornal da republika, nudar dokumentu ofisial estadu nian, nunee ikus mai ME kontrata ami nudar profesor kontratadus,” dehan portavoz Elisiario Soares Barreto ba jornalista sira liu husi konferensia imprensa iha jardim 5 de Maio Colmera, Kuarta nee (20/12/2023).

Nia dehan, sira la aseita no sei la partisipa iha teste nee, tanba lo-loos nee teste bele realiza ba maluk sira neebe seidauk tama iha sistema kuadro pesoal ME. Enkuantu profesores kontratadu 2023 tama ona iha sistema kuadro pesoal ME nian, tanba sira iha ona ID SIGAPNET, numeru PMIS no numeru payroll. Ho ida nee laiha razaun atu sira tuir fali teste, maibe ba sira mak so iha formasaun kontinua iha konteudu kurrikular sira neebe INFORDEPE realiza kada periodu iha tinan 2024 ba oin.

“Ami la aseita no la partisipa teste, tanba dekretu lei no 31/2023, 31 de Maio neebe vinkula ami profesores kontratadus 2023, tuir artigu 11 pontu 1-5 konaba ingresu espesial no artigu 38 pontu 1 neebe klaru no momos konaba avaliasaun dezempenu ba profesores kontratu hotu-hotu, nunee husu ba exelensia nain rua atu labele desvia konteudu lo-loos husi dekretu lei refere,” nia afirma.

(jac)

LEAVE A REPLY

Please enter your comment!
Please enter your name here