OEKUSI, STLNEWS.co – Profesores hamutuk 56 husi Munisipiu Likisa asina ona kontratu iha primeira faze, maibe sira kestiona sira nian salariu neebe too agora seidauk tama iha konta bankaria.
Haktuir Direitor Servisu Edukasaun Munisipiu Likisa, Carlos Lopes ba STL liu husi telefone, Sesta nee (08/09/2023).
“Ita nian profesores sira seidauk simu salariu, sira hamutuk 56 neebe mak asina kontratu iha primeiru faze, sira telefone hau, maibe hau dehan pasiensia oituan, tanba buat hotu nee sei prosesu iha ministeriu, nee duni ita nian profesores 56 mak asina ona kontratu iha Munisipiu Likisa,” nia dehan.
Tuir Carlos, husi numeru profesores kontratu neebe mensiona, kompostu husi nivel pre eskolar ba too iha nivel ensinu sekundariu, tanba too agora profesor sira nee seidauk simu sira nian salariu.
Nunee mo Diretor SEM Vikeke, Domingos Brandao dehan, konaba salariu ba profesores kontratu, balun dehan seidauk, 155 profesores husi Munisipiu Vikeke, neebe mak asina kontratu iha primeiru faze ninia.
“Husi numeru neebe ohin hau mensiona, husu profesores ida pur ida, maibe dehan salariu seidauk tama, neebe mak liu husi WA, facebook, laiha ema ida mak dehan sira simu ona salariu, ita nian profesores sira mos la mai kestiona iha edukasaun munisipal,” tenik nia.
(jac)
