DILI, STLNEWS.co – Profesora kontratu durante tinan 10 ona, senti tristi tanba too agora sira nian salariu laiha mudansa.
Haktuir Octaviana Julio de Sousa hanesan profesora kontratu husi Pre Eskolar Sagrada Familia Vila-Verde ba STL iha nia knaar fatin, Segunda nee (28/08/2023).
“Ami senti tristi, tanba ami nian estatutu kontratu nee seidauk klaru mai ami, no ami nian salariu mos too agora seidauk mudansa, sei nafatin too agora, hau asina kontratu iha tinan 2013, maibe too agora ami nafatin kontratu. Senti tristi, ami husu ba Ministeriu Edukasaun oinsa haree ami nian estatutu, atu nunee bele halo mudansa ba ami nian salariu neebe too agora seidauk iha mudansa,” nia dehan.
Nia dehan, too agora sira nian salariu sei nafatin kontratu, agora daudaun salariu neebe simu kada fulan ba kontratu ninia mak US$ 204, salariu ida nee la sufisiente, tanba agora daudaun folin sasan mos sae, no presiza nesesidade uma laran mos barak.
“Ita mos ho familia, neebe salariu ida nee la sufisiente ba ami, agora tinan 2023, hau hanorin tinan 10 ona, tanba hau hetan asina kontratu iha tinan 2013. Ami hakarak muda ami nian estatutu kontratu ba permanenti,” nia afirma.
Nunee mos Kordenador Pre Eskolar Sagrada Familia, Cornelio Antonio Soares dehan, too agora profesor kontratu nain rua nee sei simu sira nian salariu kada fulan US$ 200 resin deit, iha nee profesor permanenti nain 3, kontratu nain 2 no voluntariu nain 1.
“Ami nian profesor kontratu tuan nain 2, maibe hau nian haree sira kontratu tinan barak nian laran ona, maski ita nian profesora sira nee eskola hotu remata graduasaun tiha ona, maibe sira nian salariu sei lao nafatin ho ida kontratu,” nia esplika.
Iha sorin seluk, Diretor Jeral Administrasaun Jestaun no Finansas husi ME, Antoninho Pires hatete, atu ensere sira ba rejime espesial nee, maibe sira neebe kontratu foin lalais nee la hanesan ho sira tuan, maski sira kontratu hotu, maibe sira nee antigu tiha ona, maibe 1.499, foin daudaun kontratu nee husi voluntariu mak sira ba kontratu. Agora atual neebe antigu nee kuaze 4.900 ital.
“Sira nia salariu nee sei mantein, ami seidauk bele muda, tanba ami seidauk ensere buat ida dekretu lei foun nee, nee ami seidauk ensere, nee iha fulan Agostu ou Setembru nia laran mak ami foin ensere. Atu ensere nee tenki muda fali sira husi kontratu nee ba iha rejime kareira neebe haruka ona ba, nee sira kontratu hela ho administrasaun publika ninia, ho rejime jeral,” dehan Pires.
(jac)
