OEKUSI, STLNEWS.co – Profesores sira la halo violensia hasoru estudante, profesores tenki hanorin ho pasiensia, hanorin ho lian neebe edukativu.
“Ita esplika lisaun ho diak no mamar, nee labarik sira kontenti, no iha inisiativa mai eskola, ida nee mak ami utiliza iha ami nian metodu hanorin iha sala laran, hau nia profesores sira mos hatene, dala ruma hau koalia, maski mai tarde mos ita koalia mamar, no labele koalia lian makaas ba ita nian estudante sira nee. Ita agora eduka ita nian estudante sira tuir era modernu,” dehan Diretor Interinu EBC 27 de Setembru Noafafo, Maximiano da Silva Boavida ba STL, Kuarta nee (06/09/2023).
Maximiano dehan, tenki eduka estudante sira oinsa barani aan, se la barani oinsa buka meus labarik nee bele mai eskola, labele siak, se kuandu siak aban nunee la mai ona eskola, liu-liu primeiru no segundu ano sira, entaun nudar edukador motiva sira nudar aman iha eskola, tanba aman ida iha eskola nee atu eduka labarik sira sai matenek, eduka sira hanesan oan para labarik bele tau konfiansa ba profesores sira.
“Dala ruma koalia nunee, ita eduka labarik tuir ita nian konsiensia edukador, nudar manorin tenki uza lian neebe midar no mamar, para ita nian estudante sira bele tau konfiansa mai ita. Iha tempu portugues ami eskola oituan deit, neebe ema halo violensia mai ami, maibe tempu agora eduka labarik sira ho diak, ita tenki pasiensia no sofre ba ita nian oan sira. Ita nudar manorin hanesan ohin hau dehan, ita tenki pasiensia, ita eduka sira ho diak para aban bainrua sai ema neebe edukativu. Hau la husu kargu neebe hau simu, bainhira hau sai kordenador tenki kumpri oras neebe mak estadu fo mai,” tenik nia.
Nunee mos Luciano da Costa hanesan estudante dehan, ensinu aprendizajen lao ho diak, no profesores sira mos hanorin ho diak, la halo violensia hasoru estudante, maibe oinsa eduka estudantes neebe diak iha futuru.
“Ami nian ensinu aprendizajen lao ho diak, tuir orariu neebe mak iha, ami nian profesores sira eduka ami ho diak,” dehan nia.
(jac)
