DILI, STLNEWS.co – Universidade Oriental Timor Lorosae (UNITAL) bainhira atu halo rekrutamentu ba dosentes, nee depende ba departamentu neebe mamuk ka dosentes neebe sei menus.
Lia hirak nee haktuir husi Reitor Universidade Oriental Timor Lorosae (UNITAL), Florindo Pereira ba STL iha nia knaar fatin, Segunda nee (10/04/2023).
“Ita haree ba sira neebe mak hetan valor diak, ida nee mak ita valoriza no fasilita sira para bele hetan bolsa ba iha eskola seluk iha rai liur, para fila-fali mai bele hanorin, nee mos la barak ida, laos ita atu rekruta barak-barak lae, maibe dala ruma tinan ida ita rekruta dosentes ba iha departamentu ida, rua ka tolu, ida mos mak ita halo rekrutamentu ba maluk sira neebe mak gradua uluk ona, no sira hetan ona servisu mak mai hanorin,” nia afirma.
Nia afirma, UNITAL atu rekruta dosentes foun sira maibe terbatas, tanba depende ba kemampuan neebe sira iha no sesuai ho sira nia nesesidades neebe mak sira iha ona, kada tinan sira halo rekrutamentu ba iha fatin neebe mak mamuk.
“Atu halo rekrutamentu ba dosentes, nee ami sei haree, maibe ami halo rekruta nee ba iha mestradu ba leten, tanba iha universidade laos S1 mak mai hanorin fali S1, nee hau hanoin labele, entaun tenki ba iha S2 ho S3, tanba ami halo rekrutamentu ba dosentes depende ba iha departamentu neebe mak ami nian dosentes sira sei menus,” haktuir nia.
Reitor UNITAL nee dehan, daudaun nee UNITAL iha fakuldade 7 mak hanesan ekonomia, saude, direitu, agrikultura, engenaria no fakuldade edukasaun, husi fakuldade hitu nee, ninia departamentu hamutuk 35.
(jac/mad)
