DILI, STLNEWS.co – Maski profesores kontratu husi Munisipiu Manatutu ba cek ona sira nian salariu iha banku, maibe osan seidauk tama iha sira nian konta bankaria.
Haktuir Diretor Servisu Edukasaun Munisipiu Manatutu, Graciano de Jesus Baptista ba STL liu husi telefone, Kinta nee (17/08/2023).
“Ita nian profesores sira nian salariu too agora seidauk tama iha sira nian konta bankaria, maski sira nain ba cek ona iha banku, maibe too agora salariu seidauk tama iha konta bankaria, ita nian profesores sira mos la ezije, tanba buat sira nee sei iha hela prosesu nian laran,” dehan nia.
Tuir Diretor SEM Manatutu katak, profesores sira nain ba konfirma iha banku, tanba osan nee tama, nee tama iha profesores sira nian konta bankaria, iha Manatutu professores kontraru neebe asina ona kontraru, nee hamutuk 64.
“Ita nian profesores sira nee hamutuk 65, maibe tanba nain 1 rezigna aan, entaun daudaun nee hamutuk 64. Salariu nee nain ba cek iha banku, maibe osan seidauk tama iha sira nian konta bankaria. Ita nian profesores sira nee asina kontratu iha ita nian governu anterior liu husi Ministeriu Edukasaun,” nia haktuir.
Iha fatin la hanesan, Agostinho Pinto nudar profesor kontratu dehan, too agora sira nian salariu seidauk tama, maski sira asina ona kontratu, maibe sira seidauk simu sira nian salariu, no sira hein deit bainhira mak halo pagamentu ba profesores kontratu sira.
“Ami hein deit, no bainhira mak halo pagamentu mai ami profesores kontratu neebe mak asina ona kontratu husi ME, maibe too ohin loron ami nian salariu seidauk tama, ami espera ita nian governu sei haree asuntu ida nee,” nia dehan.
Iha fatin seluk, Diretor SEM Likisa, Carlos Lopes hatete, liga ba salariu profesores kontratu ninia, osan nee seidauk tama, maibe ida nee kompetensia husi nasional ninia para haree asuntu ida nee.
“Hau hanoin nee kompetensia ita nian ME nasional ninia, maibe profesores mos kestiona dehan salariu seidauk tama,” nia deklara.
Bainhira STL tenta atu halo intervista ho Diretor Jeral Administrasaun Jestaun no Finansas husi ME, Antoninho Pires, maibe la konsege tanba okupadu ho servisu seluk.
(jac)
