Seidauk Iha Lei Reforma Obrigatoriu

DILI, STLNEWS.co – Seidauk iha lei ba reforma obrigatoriu, tanba nee profesores hirak neebe tama ba idade reforma, sira sei kontinua halao knaar hanesan baibain.

Lia hirak nee hatoo husi Koordenador EBF Hans Klem Bairo-Pite, Flaviano da Costa de Jesus dos Santos ba STL iha nia kaar fatin Bairo Pite, Kuarta nee (07/02/2024).

“Ami nian profesores nain 3 mak atu tama ba iha idade reforma. Ita nian profesores sestu ano nain 2 no kintu ano nain 1, nain 3 nee ho idade 75 ba leten, ida atu ba 74, purtantu nain 3 nee mak tama ba idade reforma, profesores sira nee kaer disiplina tomak hotu, no sira sai hanesan profesores da turma,” tenik nia.

Nia dehan, konaba karta rekerimentu hatama ona ba ME ka lae, nee nia rasik mos ladun hatene no fila-fali ba pesoal idak-idak, tanba seidauk iha lei reforma obrigatoriu, tanba nee depende ba pesoal idak-idak senti katak idade reforma ona, sira bele hatama rekerimentu.

“Ami presiza tan profesores nain rua para kompleta liu tan turma sira nee, maibe enjeral atividades ensinu aprendizajen lao diak, profesores nain 6 mak la ativu ona, bainhira sirkular sai sira mos rona, depois eskola mos fo hatene sira, sira nee kontratu konaba eskola ba uma ninia, maibe agora sira hanorin mos para hotu ona,” katak nia .

Nia akresenta, sala aprendizajen hamutuk 9, iha primeiru turnu no segundu turnu, primeiru turnu nee sala 9, segundu turnu mos sala 9.

Iha fatin seluk, Diretor Servisu Edukasaun Munisipiu Manatuto, Patricio da Cruz Quintao hatete, profesores idade reforma iha Manatutu nee iha, maibe hanesan diretor foun foin asumi kargu ida nee, presiza konfirma lai dadus lo-loos mak bele fo komentariu.

“Reforma nee iha, maibe hau mos foin asumi kargu ida nee, nee duni hau konfirma lo-loos lai dadus profesores reforma nee hira,” nia afirma.

Nunee mos Anita Tavares Ribeiro de Jesus hanesan Diretora Rekursus Umanus iha ME hatete, lei ba reforma obrigatoriu nee seidauk iha, tanba nee labele obriga ema atu tama ba reforma, tanba nee iha profesores balun neebe idade avansadu ona, maibe sira sei kontinua hanorin nafatin iha eskola.

(jac)

LEAVE A REPLY

Please enter your comment!
Please enter your name here