DILI, STLNEWS.co – Servisu Edukasaun Munisipiu (SEM) Ermera konfuzaun ho problema labarik sira nia foto, neebe fo sai iha media sosial, husu harii eskola iha Goulolo, Ermera.
Kestaun nee haktuir husi Diretor Servisu Edukasaun Munisipiu Ermera, Eduardo Martins ba STL liu husi telefone, Kuarta nee (04/10/2023).
“Durante nee ami mos buka hela fatin, maibe seidauk hatene fatin neebe labarik sira hasai foto atu loke eskola, tanba Goulolo nee iha Postu Letefoho, agora Suku Potete iha Postu Ermera Vila, agora informasaun nee komplikadu, fatin nee ami seidauk hatene, tanba temi Goulolo nee Letefoho nian,” katak nia.
Eduardo dehan, too agora informasaun nee sai komplikadu, tanba sira ba husu iha Goulolo la hatene problema nee, depois ba husu tan iha Poitete mos la hatene.
“Ita nian superintendente nee ema Goulolo, agora hau iha Suku Poitete, maibe hau mos la hatene, nee duni informasaun ida nee ami buka hela, maibe seidauk hetan,” tenik nia.
Iha fatin seluk, Ministra Edukasaun (ME), Dulce de Jesus Soares hatete, estudante sira iha Aldeia Ilaibote, Suku Goulolo, Munisipiu Ermera, lao ba eskola iha Poetete ho distansia neebe dook husi sira nia hela fatin. Kazu ida nee laos kazu ida neebe ema hotu hakfodak, tanba dala ruma mos komunidade sira nee hela mesak-mesak iha fatin ida. Ezemplu labarik bele iha nain 10, 20 bele mos 100, entaun governu la bele lori tuir eskola ba estudante neebe numeru kiik.
“Entaun iha loron hirak nee ami haruka ona ekipa ida ba tun haree no indentifika problema nee halo nusa, laiha duni eskola ka iha maneira seluk para ita bele halo, se ita loke eskola ida, por ezemplu eskola nee estudante primeiru ano, segundu ano nee diak, bele iha profesor nain ida ou nain rua,” nia komenta.
Dulce dehan, ME atu loke eskola ida la fasil, laos dehan katak tanba deit ema ida koalia, governu tenki halai tuir ba hodi loke eskola iha neeba, maibe dala barak ema koalia katak, atu harii eskola nee fasil, maibe atu garante nia funsionamentu nee laiha.
(jac)
