DILI, STLNEWS.co – Semana oin hahu ezame segundu periodu, tanba nee husu ba estudantes husi Eskola Ensinu Baziku Sentral (EBC – sigla portugues) 30 de Agostu presiza prepara aan no kuidadu saude, hodi hasoru ezame refere.
Tuir Baltazar Barromeu hanesan Komisaun Organizadora ba ezame hatete, hanesan Komisaun organizadora ba preparasaun ezame segundu periodu ninia, oinsa sira prepara ba materia, ohin hahu prepara pontus ezame ba estudante sira.
“Ami prepara materia ba ita nian estudante sira, ami mos halo simulasaun ezame nasional nian kopi, atu nunee ami tuir modelu tuir ezame nasional ninia,” dehan Baltazar ba STL iha nia knaar fatin, Segunda nee (01/08/2022).
Iha fatin hanesan, Diretor EBC 30 de Agostu, Filomeno Salsinha hatete, tuir dadus neebe eskola iha, total estudantes neebe sei partisipa iha ezame segundu periodu hamutuk 2.220, sala mak la sufisiente, tanba nee sei fahe ba turnu tolu (3).
“Ita hatene katak, tuir kalendariu ezame ba segundu periodu sei monu iha loron 8 fulan Agostu semana oin, entaun preparasaun neebe mak ami halo ohin loron, hahu prepara ona, depois ohin loron profesor sira halo multifikasaun ba pontus ezame sira, atu nunee iha loron neebe halao ezame nee bele lao ho diak liu tan,” dehan nia.
Nia akresenta, husu ba estudante sira presiza mos sira nia saude, tanba sei la halo ezame segundu xamada ba estudante sira, ho ida nee sira tenki kuidadu saude ho diak, estudantes presiza prepara aan diak.
(jac)
