DILI, STLNEWS.co – Profesores kontratu foun nain 2 husi Ensinu Baziku Filial (EBF) Hans Klemm Bairo Pite simu deit salariu fulan ida, neebe simu iha fulan Julhu.
Lia hirak nee hatoo husi Koordenador EBF Hans Klemm Bairo Pite, Flaviano da Costa de Jesus dos Santos ba STL, Kinta nee (31/08/2023).
“Ita nian profesores kontratu foun neebe asina kontratu iha fulan Abril nian laran, husi ami nian eskola profesores nain 2 mak simu ona salariu iha fulan Julhu, agora informasaun neebe hau hetan husi ita nian profesores nain 2nee katak, simu salariu iha deit fulan Julhu, maibe tama iha Agostu nee dehan osan la tama ona ou dehan kansela fali,” dehan nia.
Nia dehan, dader nee profesores kontratu nain 2 la tama hotu hanorin, foin daudaun sira nain 2 kestiona katak, salariu ba fulan Agostu ninia sira ba cek osan la tama, iha nee profesores nain 4 mak hetan asina kontratu, nain 2 mak simu ona salariu iha fulan Julhu no nain 2 seluk seidauk simu, nain 2 mak reklamante.
“Hau hanoin ida nee kompetensia Ministeriu Edukasaun ninia, oinsa mak atu rezolve problema profesores kontratu sira nian salariu neebe mak too agora sira seidauk simu sira nian direitu ba salariu,” nia dehan.
Hatan ba asuntu nee, Diretor Jeral Administrasaun no Jestaun husi ME, Antoninho Pires dehan, pagamentu ba profesores kontratu balun simu ona, maibe balun mak too agora sira nian salariu seidauk tama.
“Hau agora iha hela foho, maibe pagamentu ba profesores kontratu balun lao ona no balun sira nian salariu seidauk tama,” nia esplika.
Nunee mos Direitor SEM Manatuto, Graciano de Jesus Baptista hatete, liga ba asuntu nee kompetensia husi ME nasional, oinsa mak haree asuntu konaba salariu ba profesores kontratu sira.
(jac)
