DILI, STLNEWS.co – Ministeriu Edukasaun Juventude no Desportu (MEJD) iha tempu badak nian laran sei fo sai rezultadu reklamantes.
Tuir Diretor Jeral Administrasaun Jestaun no Finansas husi MEJD, Antoninho Pires dehan, prosesu verifikasaun ba reklamantes sira nee kontinua lao, no dentru de ida nee hotu ona, segundu verifikasaun dadus reklamante sira nee para atu bele prienxe sira nian vaga neebe mak iha, primeira faze nee publika ona naran iha jornal da republika, balun neebe mak iha problema sira sei suspende, maibe balun neebe laiha problema nee, MEJD halo ona kontratu.
“Ami bele dehan katak, rezultadu nee ami bele fo sai, neebe iha fulan Maiu tinan nee nia laran ami sei fo sai rezultadu, hodi nunee bele publika iha jornal da republika. Hau hanoin reklamantes sira nee kuaze 5 mil reklamantes, maibe ami nian vaga nee 2111, mezmu besik 2200 ital, maibe ami prienxe tiha ona 1700, restu nee seidauk, ami sei halo hela ba segunda faze,” dehan Pires ba STL Kuarta nee (26/04/2023).
Antoninho dehan, prosesu halo kontratu ba profesores voluntariu sira iha primeiru faze nee lao hela, tanba munisipiu lima mak hatama ona kontratu nee mai tau vistu iha ministeriu, munisipiu lima nee mak hanesan Aileu, Vikeke, Manufahi, Likisa ho Maliana, MEJD halo ona kontratu, maibe munisipiu lima nee simu para atu halo deit vistu.
Nunee mos Diretor SEM Manufahi, Trinito Sarmento dehan, konaba profesores voluntariu sira nee karta reklamasaun daudaun nee iha MEJD, para hodi halo verifikasaun, tanba prosesu verifikasaun nee kompetensia husi ministeriu ninia.
“Hau hanoin ita nian reklamante sira neebe hatama nia karta reklamasaun nee kompetensia husi ami nia ministeriu, tanba nee ami nudar Diretor SEM, entrega tiha ona karta reklamasaun ba ita nian ministeriu,” nia esplika.
(jac)
