Tinan 21 Independensia, Dezafiu Barak Iha Area Edukasaun

DILI, STLNEWS.co – Restaurasaun Independensia 20 de Maio ba dala 21, maibe sei iha dezafiu ou obstaklu iha area edukasaun, tanba buat barak presiza hadia iha futuru.

Tuir Joao Orleans Tilman hanesan profesor iha EBF Hans Klemm Bairo-Pite hatete, material didatikas iha eskola balun laos dehan laiha, iha, maibe eskola balun sei falta, dala ruma husi eskola hatoo ba ministeriu katak, sei falta material didatikus, maibe too agora seidauk rezolve.

“Iha area edukasaun nee ita hotu hatene, iha mos dezafiu no obstaklu, dezafiu nee mak ita akompanha governu ida sae sempre kritika katak, buat hotu la los, maibe ami profesor nee obedese ba buat neebe husi ministeriu tutela fo mai ami, maibe haree ba vantajen no dezvantajen edukasaun nian, iha buat barak mak ita presiza hadia, infraestrutura nee esensial, tanba estudante sira tenki iha infraestrutura neebe mak diak, atu nunee estudante sira bele asesu ba aprendizajem nee lao ho diak,” dehan Joao ba STL Kinta nee (18/05/2023).

Joao dehan, dezafiu neebe mak sira hasoru konaba falta materia didatikus, tanba edukasaun nee atu sai kualidade, nee presiza ema hotu ninia kontribuisaun liu-liu politiku sira, oinsa mak iha planu neebe diak, atu nunee estudante sira nee bele lao nafatin ba oin, agora tinan 21 independensia, maibe sei hasoru dezafiu ba area edukasaun.

Iha fatin seluk, Diretor Servisu Munisipiu Likisa, Carlos Lopes dehan, bele dehan ho tinan 21 TL independensia nee bele klasifika 80% eskola sira iha area remotas nee lao ho diak, maibe iha 20% nee seidauk, signifika iha eskola balun seidauk bele hetan novu konstrusaun.

(jac)

LEAVE A REPLY

Please enter your comment!
Please enter your name here