DILI, STLNEWS.co – Universidade Catolica Timor Leste (UCT) prepara aan ba avaliasaun institusional, neebe mak sei halao husi Ajensia Nasional Para Avaliasaun Akreditasaun akademika (ANAAA).
Lia hirak nee hatoo husi Reitor UCT, Pe. Joel Casimiro Pinto ba STL iha nia knaar fatin UCT Balide, Dili, Tersa nee (02/05/2023).
“Akreditasaun institusional ba instituisaun rua ida mak UCT, tanba ami hanesan instituisaun foun ida, konserteza tenki prepara aan, ami prontu ANAAA mai halo avaliasaun, liu-liu avaliasaun instituisaun nee, hau hanoin ida nee mak atu reforsa fila-fali informasaun neebe mak sai ona husi ANAAA,” nia afirma.
Nia dehan, UCT rasik prepara ona atu lao akreditasaun nee, institusionalmente infranstrutura neebe mak sira iha, daudaun nee balun kompleta ona, inklui ho dosente neebe mak UCT iha, agora dosentes iha UCT hamutuk 96, kompostu husi sira neebe mak monitor dosen asisten, no dosen mestradu inklui doutor sira.
“Nee ba rekursu umanu nian, maibe ba staf mos hanesan, sira nian level nee husi SMA too iha mestradu, nee ami nian staf administrasaun nian, no atu asegura buat hirak nee hotu, hau hanoin buat rua neebe importante mak ida laboratoriu ba hotu-hotu, ezemplu ba siensia exata nian mak laboratoriu ba biolojia, kimia, laboratoriu ba farmacia, infarmajen no laboratoriu ba teknolojia informatika,” tenik nia.
Nia akresenta, UCT iha ninia laboratoriu ba estudantes sira, tanba hirak neebe seidauk hatene komputador, liu-liu uza ba iha aprezentasaun power point, teknolojia prepara sira iha klase teknolojia informatika, nomos iha klase komunikasaun nian, neebe prepara estudantes sira ba aban bainrua sira hakarak sai aprezentadóra ou aprezentadór, nee sei iha laboratoriu ba sira para bele halo pratika.
Entretantu, Reitor ISC Sebastiao Perreira dehan, avaliasaun husi ANAAA nee sempre halao iha universidade sira iha rai laran, entaun papel husi Universidade ninia, oinsa haruka ninia dosente sira kontinua ba estudu, hadia infransturtura inklui kria fasilidade no kondisaun neebe mak diak ba estudante sira.
Iha fatin seluk, Diretor Ezekutivu ANAAA, Nilton D. Paiva Mau hatete, agora daudaun tempu seidauk iha atu halo intervista ba asuntu ida nee, tanba sei okupadu oituan ho enkontru servisu ninia.
“Konaba asuntu ida nee, hau hanoin hau seidauk halo intervista, tanba hau sei tuir hela enkontru ida, karik aban nunee mak bele mai intervista ho hau,” tenik nia.
(jac)
