DILI, STLNEWS.co – Universidade Catolica Timorense (UCT) seidauk iha planu atu loke fakuldade foun, maibe sei mantein ho fakuldadde haat neebe iha ona.
Kestaun nee hatoo husi Reitor Universidade Catolica Timorense (UCT), Pe. Joel Casimiro Pinto ba STL Kuarta nee (05/04/2023).
“Ami sei hein lai tinan oin iha avaliasaun akreditasaun institusional ninia, hotu tiha ida nee foin ami loke fila-fali programa ou fakuldade foun, tanba neste momentu ami iha fakuldade haat nee deit, ami nian fakuldade haat nee mak hanesan siensia medika, siensia sosiais, fakuldade edukasaun, literatura ho arte, depois engenaria agrikula.
Iha UCT too ohin loron fakuldade haat nee mak sei mantein nafatin hodi simu estudantes,” nia dehan
Reitor UCT nee akresenta, planu UCT nian iha tinan 2024 sira foin bele haree, bainhira atu loke fakuldade foun tenki iha estudu viabilidade lai, bainhira tinan nee remata, tinan oin bele iha hanoin atu loke fakuldade foun.
“Husi fakuldade haat neebe ohin hau temi ona, ninia departamentu 20, maibe iha departamentu balun neebe seidauk lao, balun lao tiha ona, agora foin lao, foun nee foin atu lao nee mak agro pekoaria. Iha UCT agora daudaun ninia dosentes hamutuk atus ida, ho ninia estudantes total mil duzentus,” nia esplika.
Pe, Joel akresenta, dosentes neebe ho grau lisensiatura sira konsidera hanesan monitor ou asistente, tanba sira tenki promove sira nian aan ba iha mestradu ho doutotamentu, aleinde nee mestradu ho doutaramentu.
(jac)
