DILI, STLNEWS.co – Ministeriu Edukasaun (ME) ho UNESCO halao enkontru hodi diskuti kooperasaun servisu iha area edukasaun, tanba durante nee UNESCO apoiu ona ME.
Lia hirka nee hatoo husi Ministra Edukasaun, Dulce de Jesus Soares ba jornalista sira, hafoin hasoru malu ho UNESCO iha sala VIP ME Vila-Verde, Dili, Tersa nee (15/08/2023).
“Ohin enkontru ho UNESCO, senhora nee reprezentante husi UNESCO neebe mai husi Jakarta, hanesan hau dehan, atu atualiza fila-fali kooperasaun neebe mak durante nee Ministeriu Edukasaun iha ona ho UNESCO, liu-liu durante nee sira apoiu barak ona dezenvolvimentu kurrikulu, nomos atividades barak iha eskola,” nia dehan.
Dulce dehan, buat diak neebe UNESCO espresa katak, sira hakarak atu fo apoiu ba iha digitalizasaun edukasaun, entaun ida nee hanesan programa ida iha IX Governu Konstituisaun ninia, no husi ME apersia tebes-tebes programa nee, no sei iha parseiru barak neebe atu servisu hamutuk.
“Ami apersia tebes-tebes, no sei iha parseiru barak atu bele servisu hamutuk hodi bele haree programa ida nee bele lao ba oin ho diak, nomos apoiu husi ita nian parseiru sira, ita bele reforsa liu tan iha ninia implementasaun iha terenu,” nia afirma.
Nunee mos Direitora UNESCO, Maki Katsuno-Hayashikawa dehan, liu husi enkontru ida ohin nee atu kongratula mos ministra, tanba foin asumi kargu ida nee hanesan Ministra Edukasaun, no objetivu ida ohin nee hanesan enkontru kortezia ida ba ministra, oinsa UNESCO nian apoiu ba Ministeriu Edukasaun nian ba futuru.
“Neste momentu UNESCO apoiu ME liu husi projetu ida, nomos iha futuru oin mai ita haree pinsa para UNESCO bele apoiu iha revizaun ba kurrikulu, nomos ba iha digitalizasaun edukasaun ninia. Neste momentu ami seidauk iha fundu ruma, tanba agora ami foin iha faze diskusaun nian laran,” nia esplika.
(jac)
